Suzy Maduro Consultancy ta un realidad

Suzy Maduro no ta un figura desconoci den mundo di PR aki na Aruba, como tambe mercadeo y farandula. Awo el a lansa su propio consultancy yama Suzy Maduro Consultancy y a revela cu e ta bay profila su mes como un motivational speaker.

Suzy Maduro a splica cu e ta bai ofrece consulta riba “public relations” y communicacion y e ta bai profila su mes como un “motivational speaker” pa duna diferente gruponan den comunidad hermentnan valido pa mehora nan imagen y nan relacion cu e publico.

Otro terenonan cu e por yuda ta den comunicadonan pa prensa local como internacional, planificacion di comunicacion cu media, ehecuta trabounan cu kizas compania of organizacionnan no ta yega na dje.

Suzy Maduro a bisa:
“Semper mi tabatin un deseo di un dia tin mi mes negoshi y ta pesey awe mi ta contento di porfin a tuma e paso aki. Esaki ta e momento perfecto pa mi bay sigui desaroya y pasa mi conocemento y experiencianan pa bon uso. Mi ta pensa cu lo mi por nifica mas pa compania of organizacionnan cu no tin presupuesto pa un “PR full time” pero cu algun bes kier manda informacion pa clientenan y of kier keda cu bon relacion cu e publico.”

Un tiki di Suzy Maduro su carera

Suzy Maduro a termina su Havo na Colegio Arubano y despues a bay Merca pa sigui studia y na unda el a obtene e titulo di “Bachelor of Science in Journalism” for di Bowling Green State University na Ohio, U.S.A.
Suzy Maduro tin un trayectoria largo den su carera profesional na Aruba, cual a cuminsa como relacionista publico den sector hotelero.

Despues di esaki el a bay traha como asistente di e secretario di prensa di Gobierno di Aruba, y na 1989 Maduro a bay traha na SETAR como Relacionista Publico.
Durante su carera el a haya oportunidad di a traha entre 1991 pa 1995 den Public Relations na Gabinete di Minister Plenipotenciario di Aruba na Den Haag, Hulanda.

Na su regreso na Aruba el a bay traha bek na SETAR, na unda el a traha como PR officer y despues como Corporate Communications Officer y a pasa den tur e cambionan di e compania y tur e desaroyo cual a conduci na final cu el a bira un NV.

Awe Suzy a dicidi di lansa su propio consultancy cu ta carga su propio nomber.
“Mi tin hopi di comparti cu e publico en general y mi ta dispuesto pa motiva cualkier persona pa nan traha pa surpasa nan propio expectativanan, tuma curashi pa sigui bo soñonan, traha un plan y traha pa yega bo meta pa satisfaccion den decision nan tuma pa bo carera” Maduro a termina bisando.
Pa mas informacion por acudi na www.suzymaduro.com