Un total di 24 seleccion nacional femenino di futbol a cuminsa den e FIFA Women’s World Cup France 2019. E etapa di grupo a termina cu weganan di Grupo E y F cu tabata entre Hulanda y Canada, Cameroen y Nueva Zelandia, Suecia y Merca, Thailand y Chile. Den e copa aki 16 team a pasa p’e octavo final, unda cu e miho 12 y e miho 4 perdedonan a pasa. Diasabra e fase di octavo final lo inicia y esaki lo bay te cu diamars dia 25 di Juni pa despues haya e 8 teamnan cu lo sigui.
E prome wega tabata di Grupo E, unda Hulanda a topa Canada y Cameroen contra Nueva Zelandia. E ultimo miho perdedo a sali di e grupo aki cual tabata e seleccion di Cameroen cu a gana Nueva Zelandia 2-1, un wega cu Nueva Zelandia tabata domina. Cameroen a tira riba gol 22 biaha y Nueva Zelandia 9 biaha, ambos team a haya 1 caarchi geel respectivo.
Tur dos a busca pa bay cu e victoria pero na final Ajara Nchout a anota e gol ganado na 95 minuut di wega. E teamnan di Canada y Hulanda tabatin 6 punto ambos y esey a pone cu mester a mira kende lo pasa prome y di dos. Den un wega cu Canada tabata domina, nan a perde esaki contra Hulanda cu e score di 2-1. Desde comienso di wega Canada a yega na diferente ocasion e area di gol di Hulanda y anota e prome gol cu referee a kita esaki pa motibo di posicion delanta. Wega a continua unda cu Hulanda ta bin habri e mercado cu gol di Anouk Dekker. Canada a tabla e wega na 60 minuut cu gol di Christine Sinclair. Lineth Beerensteyn a anota e di dos gol na 75 minuut di wega pa asina bay cu e victoria.
Den Grupo F e teamnan di Merca y Suecia tabatin 6 punto, cual wega tabata uno di mira ken ta sali prome y di dos. Merca a bay cu e victoria di 2-0 pa asina sali number 1 y Suecia number 2. E gol mas lihe anota den e copa mundial a bin na 3 minuut di wega na momento cu Lindsey Horan a anota esaki riba un tiro di skina di Megan Rapinoe. Wega a continua y na di 50 minuut cu un auto gol di e defensa di Suecia Jonna Andersson haciendo e wega 2-0. Suecia a busca pa anota na varios ocasion pero no a logra esaki.
Chile a gana Thailand cu e score di 2-0, pero a keda elimina di e torneo mirando cu nan mester a gana 3-0 pa por a sigui. E prome gol a cay na 48 minuut di wega cu un autogol di e keeper di Thailand Waraporn Boonsing. E wega a continua unda cu Chile a domina esaki y e di dos gol ta cay na 80 minuut di wega door di Maria Jose Urratia. Faltando 5 minuut prome cu e wega a termina Chile a haya pinalti y Francisca Lara a cobra esaki pero a tira e bala afo. Asina aki Chile a keda elimina for di e copa mundial.
E prome wega di e octavo final lo ta entre Alemania y Nigeria pa 11:30am y e di dos wega lo ta pa 3:00pm entre Norwega y Australia. Diadomingo Inglatera lo ta topando Cameroen pa 11:30am, mientras cu Brazil y Francia lo topa otro pa 3:00pm. Dialuna Merca lo topa Spaña pa 12:00pm y pa 3:00pm Suecia contra Canada. Diamars Italia lo topa China pa 12:00pm, mientras cu Hulanda lo ta enfrentando Hapon pa 3:00pm. E final ta yegando pocopoco unda cu Merca lo por bay cu e titulo of lo tin un campeon nobo.
