E comision di alumno di Filomena College Mavo (leerlingenraad) bou supervision di e comision FIA (Filomena In Actie) a bishita Parlamento dialuna ultimo durante e reunion di presupuesto di dialuna, pa experiencia di cerca y como publico, con esaki ta cana.
Segun parlamentario Sue Ann Ras (MEP), esaki sigur ta un bon forma pa trece interes y confiansa den politica bek den comunidad, pero specialmente cerca nos hobennan, unda ta importante pa splica y demostra cu politica ta diferente y cu tin un cambio den actitud y mentalidad di esunnan cu funcion di mas halto den un pais. “Nos hobennan sigur ta sigui ehempel di e grandinan y si como adulto nos mantene esaki semper den nos mente conscientemente, nos ta un paso mas dilanti”, Ras a cuminsa na bisa.
COMISION
E comision di alumno di Filomena College Mavo ta consisti di 21 alumno cu ta representa un mini parlamento na scol, ta traha hunto cu directiva y e docentenan pa crea un ambiente dushi na scol y tambe yuda conscientisa nos hobennan riba diferente topico di interes como un bon ciudadano.
E ALUMNONAN
“E alumnonan semper tabata vocifera durante nos lesnan di Papiamento, ora nos yega na topico di politica, cu nan ta cansa di e politica di falta di respet y cu no ta traha pa henter pais. E topiconan manera: deporte, finansa, educacion na Aruba mes, cultura, problema social bou di e hobennan, conocemento general y orientacion riba mundo, tabata semper riba mesa. Nan ta interesa y sigur nan tambe kier aporta nan ideanan pa bienestar general di nos hobennan”, segun Ras. Esaki sigur tin un nificacion grandi, mirando cu parlamentario Sue-Ann Ras, ta un ex docente di dicho scol y semper tabata percura pa su alumnonan ta critico como alumno y tin interes pa bienestar di nan mes, nan scol y hasta nan pais.
SATISFACCION
“Ta un satisfaccion grandi pa mira cu comision di alumno di Filomena College Mavo a keda concretisa, ya cu ta algo cu ta basta tempo nos kier a realisa. Na mes momento ta yena mi cu orguyo, pa wak con mi ex coleganan, Raquel Leocadia, Joan Mahendrepersad y Jennely Heyliger ta eherciendo nan funcion cu hopi pasion y dedicacion y na mesun momento ta inculca conscientisacion, respet y aprecio pa e nificacion berdadero di politica na Aruba”, Ras a termina finalisando.
