A pesar cu Conade a otorga 1 miyon peso, e deportista a paga su propio biahe, no tabatin seguro medico ni seguro di bida. Su famia tabata esun cu a core cu e gastonan medico, no a haci autopsia y e informe medico ta indica cu el a fayece pa causa natural. E curpa a wordo crema y su shinishi ainda ta na Aruba.
Rib’e anochi di 27 di october, Diana Burrola a papia na telefon pa ultimo biaha cu su pareha, Mario Lorenzo Torruco Juarez, kende tabata interna den hospital na Aruba despues di a cay den otro durante e Campeonato Mundial di Functional Fitness.
Aunke su estado di salud tabata bira mas complica, e deportista a purba trankilisa Diana, bisando cu e tabata recuperando. Oranan despues, su condicion a empeora y el a fayece diaranson 28 di october.
Den un entrevista cu Proceso, Burrola a denuncia cu e Mexico Functional Fitness Federation (MF3), bao direccion di Paulo Cesar Dueñas, no a brinda e acompañamento cu Torruco tabatin mester durante su hospitalisacion. E a cuestiona tambe e actuacion di su entrenador (cuyo nomber e no kier a revela) y e reaccion medico inicial di e organisadonan di e competencia, celebra di 23 te 25 di october na Aruba.
“Loke nos no kier ta pa esaki keda asina, pa e morto di Mario no keda solamente como un acontecimento desgarrador, algo tragico cu a pasa den deporte. Nos kier cu algo wordo haci pa otro persona no tin cu pasa e mesun dolor aki”, el a expresa.
Diabierna 23 di october, Torruco tabata participando den e prome prueba di campeonato, cu a tuma luga den un circuito costero cerca di e ruinan di Bushiribana. E atletanan mester a core dos kilometer, carga peso durante 400 meter y despues core otro dos kilometer pa bolbe.
Testimonio di e deportistanan
Marten Doede van Kammen, un competido Hulandes y socorrista, a relata cu Mario a cuminsa perde orientacion ora cu e tabata falta 400 y 500 meter pa termina e prueba.
Segun su testimonio, publica pa e plataforma di noticia tocante mundo di CrossFit, The Barbell Spin, e Mexicano a cay diferente biaha te ora cu el a keda drumi riba santo. Un competido Noruechi a sali pa busca asistencia, mientras Van Kammen y otro atleta Sueco tabata purba protege Mario contra solo y vigila su estado.
Mas despues, nan a transporta Mario den un vehiculo chikito pa e liña final, unda, segun e socorrista, e medidanan pa baha su temperatura corporal a wordo aplica demasiado lentamente.
Van Kammen a cuestiona e preparacion di e personal medico y a calcula cu e ambulance a tarda por lo menos 40 minuut pa yega. Na esey mester agrega e tempo di transporte pa Hospital Horacio Oduber, na Oranjestad, cual duracion exacto no ta conoci.
Versionnan cu ta contradeci otro
E version aki ta contrasta cu e comunicado di e federacion Mexicano, cu a informa cu Torruco a ricibi atencion medico inicial na e sitio di evento prome cu a wordo interna den hospital.
Un representante di e Federacion Internacional di Functional Fitness a asegura na The Barbell Spin cu tabatin personal di emergencia, puesto di hidratacion y un unidad medico disponibel.
Burrola a expresa su gradicimento na e competidonan cu a interumpi nan actividad pa yuda su pareha.
“Mi kier duna un gradicimento inmenso na tur e personanan cu a yuda Mario, na e competidonan cu a laga nan papel como competido y a actua cu humanidad pa yuda. Nan a duna Mario e oportunidad pa lucha pa su bida y, di cierto manera, pa por despedi di nos.”
Diana, cu ta biba na Ciudad de Mexico, a sigura cu a pasa diferente ora sin cu nan a ricibi informacion tocante loke a sosode. Tabata Maria, ruman muhe di Mario Torruco, kende a comunica e emergencia na Diana. Mas despues, e tabata papia cu e entrenador, kende a splica cu e deportista a sufri un golpi di calor y cu su estado tabata stabiel.
“Como atleta mi a pensa: ‘El a sufri un golpi di calor, nan lo dun’e suero y e mester keda aya’. Di cierto manera, papia cu e entrenador a trankilisami, pero mi tabata tin contacto cu ne solamente un biaha. Despues e no a sigui duna mas informacion tocante e estado di Mario”, el a sigui bisa.
Te diasabra 24, rond di 10:20 di mainta, Torruco a comunica cu Diana via un videocall. El a conta cu el a perde conocemento, cu e no tabata corda parti di e competencia y cu e tabatin dolor den su pianan. El a splica tambe cu e mediconan a coloca un catheter.
E mesun dia, rond di 14:20, e hospital a duna Mario salida y el a regresa na unda e delegacion Mexicano tabata hospeda. Sinembargo, segun Diana, el a sigui sinti su mes malo, tabata saca y tabatin problema pa orina.
Durante e madruga di diamars 27, su estado a empeora y el a regresa hospital. E siguiente mainta, Mario Torruco a pidi su ruman pa hib’e hospital pasobra e no tabata sinti su mes bon. Poco despues, su famia a ricibi informacion cu e lo wordo poni den coma induci.
“E ultimo biaha cu mi a papia cu Mario tabata diamars anochi, pa 11:30, y semper e a mustra su miho cara”, Diana ta corda. E ta splica cu tabata un amiga cu tabata acompaña e ruman di e deportista kende despues a comunica e noticia di su fayecimento.
E ruman di Mario a biaha pa Aruba cu su propio medio pa yud’e, aunke, segun Burrola, inicialmente representante di e federacion a bis’e cu esey no tabata necesario pasobra su ruman tabata stabiel.
Diana a recorda tambe cu el a mira publicacion di compañeronan y di e entrenador despidiendo di Aruba mientras Mario ainda tabata hospitalisa.
“Mi ta compronde cu nan vuelo lo tabata sali pa regresa Mexico, pero nan por a avisa mi cu Mario a bolbe empeora. No tabatin ningun informacion di parti di e seleccion. Esaki ta duel mi y ta duna mi lastima. Ni sikiera mi ta rabia; mi ta sinti indignacion y hopi tristesa. Bon ta cu su ruman tabata aya, pero si e no tabata aya, kico lo a pasa?”, Diana ta reclama na yoramento.
Sin seguro
Mario tabata forma parti di un seleccion di ocho deportista Mexicano, hunto cu Adriana Storey, Abel Sandoval, Orlando Burciaga, Benjamin Rivas, Guillermo de la Torre, Paul Rivera y Ulises Bocanegra, segun un publicacion na Instagram di e federacion fecha 7 di october.
A pesar di representa su pais, Torruco a paga su inscripcion, su pasashi di avion y su alohamento comparti, segun su pareha, kende no sa si e federacion a proporciona e uniformnan sin gasto adicional.
Un email electronico cu e federacion a manda dia 1 di october e federacion tabata pidi e atletanan confirma nan inscripcion den e plataforma Circle21 pa por aparece den e lista oficial di e seleccion Mexicano.
E articulo 2.4.1 di e reglamento di competencia di e Federacion Internacional di Functional Fitness (iF3) ta establece cu cada atleta mester tin un seguro personal garantisa pa su federacion nacional, cu cobertura pa accidente y malesa durante biahe y competencia, ademas di responsabilidad civil.
E seccion 2.4.2 ta specifica cu, ora un federacion inscribi un deportista, e ta garantisa cu e cobertura aki ta existi.
Sinembargo, Burrola a sigura cu e famia a haya nan cu gastonan hospitalario entre 45 mil y 50 mil dollar, ademas di gastonan funerario, cremacion y biahe di familiar, pasobra Mario Torruco no tabatin seguro di gasto medico ni seguro di bida.
Amigo y miembro di e comunidad deportivo a organisa colecta y rifa pa yuda cubri e gastonan.
E federacion Mexicano a sigura den un comunicado cu e a participa den gestion pa brinda sosten y cu e a notifica e autoridadnan Mexicano pa facilita asistencia consular. Sinembargo, Diana Burrola ta afirma cu e famia no a ricibi sosten economico di e organisacion.
E ta agrega cu di parti di e Comision Nacional de Cultura Fisica y Deporte (Conade), un persona, cual nomber e no conoce, a proporciona e contacto di un supuesto representante. Sinembargo, e ruman di su pareha a inform’e cu ningun hende a comunica cu ne.
“El a fayece pa causa natural”: Medico forense no a haci autopsia
Burrola a informa ademas cu un medico forense a realisa un evaluacion fisico y a determina cu tabata un morto natural, motibo pa cual no a realisa un autopsia.
E acta di defuncion ainda ta den proceso di transcripcion y actualmente no tin un documento disponibel cu por determina cu precision e causa medico di su fayecimento.
Mario Torruco tabatin 30 aña, e tabata dedica na entrenamento fisico y tabata participa den e operacion di gimnasio Resilience, na Puebla. Su shinishi ainda ta na Aruba, sperando cu e tramite necesario pa transporta nan pa Mexico termina.
Diana Burrola a splica cu inicialmente nan a informa nan cu e proceso lo tarda solamente algun dia, pero despues nan a comunica cu e tramite por prolonga te un luna.
E placa di Conade no a yega na e deportista
Mexico Functional Fitness Federation ta un di diferente federacion no olimpico cu Conade ta reconoce desde cu Rommel Pacheco a asumi como director. E federacionnan aki tin e Registro Unico del Deporte (RUD), cu ta permiti nan ricibi recurso federal.
Den e Plataforma Nacional de Transparencia tin un convenio pa un suma di un miyon peso cu Conade a otorga e aña aki, bao e argumento di “apoyo economico pa e disciplina, cu e finalidad di contribui na desaroyo di programa, evento y actividad deportivo, asina tambe como gastonan general di organisacion necesario pa cumpli cu su obhetivo social y su programa anual di trabao 2026 na Mexico (di januari te december 2026)”.
A pesar di e suma di placa aki, Mario Torruco a paga su propio biahe, a participa den e competencia sin seguro medico ni seguro di bida y, ora el a fayece, a keda sin e sosten necesario.
