Despues di a constata e candela di taira enorme y otro desperdicionan riba dump di Parkietenbos, Stichting Parkietenbos a manda un carta urgiendo Gobierno y su departamentonan concerni pa paga e candela mas rapido posibel y pa para di biaha mas bentamento di taira y otro desperdicio riba e dump. Tambe a urgi gobierno pa para tur kimamento di sushi cu ta tuma luga eynan.
E fundacion ya a entrega un manifiesto na luna di februari cu mas di 2000 firma di habitantenan indicando un lista di puntonan cu nan ta desea pa wordo cumpli cu nan mas pronto posibel na bienestar di salud di e bario y Aruba en general.
No por sigui tolera cu pais Aruba no ta asumi su responsabilidad pa remedia e situacion cu mas urgencia, pa elimina e molester pa habitantenan y pueblo di Aruba. E efectonan di deterioro di salud di e habitantenan, bienestar general di nos salud y di nos medio ambiente a surpasa tur limite.
