Despues cu Gobierno tabata den un “deadlock” pa algun siman, debi na e impasse den partido POR, diabierna ultimo tabatin un reunion di Conseho di Minister atrobe. Casi tur minister tabat’ey, menos Minister Dangui Oduber. Durante e reunion a haya un presentacion di ANSA, Air Navigation Services Aruba NV, un compania estatal severamente afecta pa Covid.
Mester menciona cu pa algun siman Minister Marisol Lopez-Tromp no a atende reunionnan di Conseho di Minister. Esaki specialmente pasobra su mesun 7 coleganan a firma un carta den cual ta practicamente kita su carteranan for di dje y a lag’e sin cartera.
Di otro banda, den e reunion di e comision di intermediacion, bou liderazgo di abogado mr. Arie Swaen, cu Minister Glenbert Croes, den representacion di partido MEP a declara di ta para solidario cu partido POR pa kita cartera di Minister Marisol Lopez, den un esfuerso pa fors’e tuma su retiro. Glenbert Croes a bisa Swaen cu tin un “onwerkbare situatie” debi na kierbo di confiansa.
Ta palabranan fuerte cu MEP y RED a uza contra Minister Marisol Lopez-Tromp cu ainda no a hala aden. E mandatario exigi di haya un carta di henter Conseho di Minister den cual ta hala nan carta aden y ta confirma cu awo si, despues di tur locual nan a bisa di dje, cu awor si nan por traha bek cu ne normal sin problema. Un tipo di carta asina el a haya di Andin Bikker y e Parlamentarionan di partido POR. Awor falta esun firma pa e 7 ministernan den e coalicion MEP-POR-RED.
E ausencia di Minister Dangui Oduber den e reunion di diabierna ta habri espacio pa diferente interpretacion. Kisas e tabatin otro compromiso, pero kisas e por ta tambe pasobra e ta rabia. Si sigui su publicacionnan y di su tata riba red social durante e impasse den POR, anto por conclui cu ey tin un diferencia cu probablemente no ta regla ainda. Kico ta e motibo cu nan ta rabia cu otro, no ta conoci. Hecho ta cu den e reunion cu Andin Bikker a lanta bay, argumentando cu e no lo atende ningun reunion mas di Conseho di Minister tanten cu Marisol Lopez ta eyden, cu riba e mesun dia Dangui Oduber a bisa y haci mesun cos.
E hacimento di bon entre e politiconan cu a sali bisa tanto cos den media, a para bira un situacion di ken ta “perde cara” mas. Y como cu otro aña tin eleccion, ta sinti cu ningun politico ta den posicion pa “perde cara” awo, den un esfuerso pa purba salba mas voto posibel. Un cos ta sigur, e guera cu a start entre POR y Minister Lopez, sigui pa esun di MEP contra Lopez, ta parce di ta leu di termina y cu ora e caba mes, lo tin ganado y perdedo. Pa awo, ta nota cu e popularidad di minister Lopez a crece enormemente.
