Relaciona cu e criticanan cu a sali den medionan di comunicacion contra di wardacosta, comision di Crisis COVID -19 di Gobierno a enfatisa cu desde inicio di e crisis di Covid-19, e comision y Ministerio Publico, a informa cu a tuma medidanan estricto pa controla y reduci riesgo na frontera cu Covid-19 por drenta Aruba y afecta salud di nos comunidad.
Entre e diferente medidanan tuma, ta e articulo 6.1 di e areglo ministerial cu ta encera cu ta cera fronteranan y a establece controlnan pa evita cu hendenan di afor por tin contacto cu hendenan local sin cu haci testnan prome y cu ta prohibi pa riba lama por crusa frontera y intercambia di mercancia, sea ta pisca of cualkier otro tipo di mercancia.
Siman pasa y e siman aki wardacosta a constata cu asina mes, ignorando advertencia y violando ley, tin piscadonan cu a crusa frontera riba lama y topa cu hende di otro pais y intercambia mercancia, den e casonan aki tawata pisca. Wardacosta ta actua asina cu detecta casonan asina.
Aruba mescos cu otro paisnan rond mundo ta den un estado di crisis pa cu e pandemia mundial di Covid-19 y autoridad tin cu actua pa proteha comunidad. P’esey no por reparti e mercancia confisca pasobra cu no sa ki riesgo e ta representa pa salud di comunidad.
Un biaha mas ta haci un apelacion pa evita di participa den e actonan contra ley aki ya cu autoridadnan lo actua pa proteha comunidad di Aruba.
