Ta compronde si cu ta bay tin un caso cu a entama contra di oficina di mediador di gobierno di parti di gerencia di APA, pasobra nan no ta bay guli e pildo pa un referendum cu TOPA.
De Cuba por sigura cu por papia cu mayoria di e trahadonan di nautische dienst y ta spera cu nan compronde e mensahe cu STA a trece pa nan. Pasobra si nan bay kibra awor aki for otro, e negociacion por tranca formal na caminda y STA a cuminsa caba cu e negociacionnan pa un contracto colectivo. STA tabata tin un presentacion di parti di gerencia di APA, den cual nan lo a splica un ke otro y tambe lo atende riba e parti financiero di e compania.
STA a bisa den pasado, ora cu a firma e ultimo contracto colectivo, ta duna espacio na APA NV. A duna espacio suficiente. Awor aki e momento a yega cu ta kere cu e trahadonan tin di haya nan fair share y esey sindicato STA lo bay pe tambe, semper y cuando no ta pusha e compania den un situacion financiero dificil.
STA ta mira cu tin espacio. STA ta kere cu tin cambionan cu mester tin cu haci, vooral locual ta trata e Port Chargesnan cu a ripara cu ta placa cu tin cu bin pa APA. Pero ta placa cu ta reparti pa tram, ta come un parti grandi di e placa aki y Arutram, tur hende sa cu ta un compania cu a lanta cu ta sangrando tur dia. E no ta treciendo nada aden pa e pais Aruba y e no ta beneficiando nos turismo tampoco, si mira e cantidad di hendenan ta uzanan.
Bo ta hayabo tambe cu tin un cierto cantidad di placa tambe ta bay pa artesania y pa e museonan tambe di Aruba. No tin nada contra pa gobierno yuda e fundacionnan aki cu esey. Pero no por bay yuda nan a cuesta di placa cu tin di drenta pa APA directamente. Segun de Cuba, mas bien tin di hinca locual ta e subsidio cu tin di bay pa e luganan aki den bo presupuesto y atende cun’e den staten. Ya e ora eynan, tur e fundacionnan di museo tin nan placa cu tin cu traha cun’e. Esunnan di artesania tin nan placa pa atende cun’e. Tambe e tram, lo mas miho cu gobierno por haci ta sink e trank eynan p’afo di e rifnan banda pazuid, pasobra nan ta dunando Aruba ningun ganashi. Pa de Cuba, e ta un negoshi cu a cuminsa pa probecho di algun hende. A mira cu e no ta resulta na nada. Tin un caya grandi cera. Tin un comercio cu dia pa dia ta muri un tiki mas y no ta situacionnan saludabel. Gobierno tin cu tuma decision a corto plazo, actua lihe, pa sikiera salba e centro di Oranjestad, cual ta un centro comercial bastante grandi ainda. Apesar cu mas di 60 tienda a cera caba y STA ta lamenta esaki.
Si bay bek riba e situacion di APA, awor aki e trahadonan lo bay compronde e seriedad di e situacion aki y tambe ta spera cu gerencia di APA tambe compronde cu ta bay sinta na mesa pa negosha seriamente y kier mira un adelanto substancial den e negociacion aki, pasobra e ultimo cu tabata tin, a conoce adelanto, pero no manera tabata kier. A wanta pasobra tabata tin e fase transitorio di e mudamento di waf di container pa bay Barcadera y a mira tambe cu den e negociacion cu tabata tin eynan APA a laga bastante bay. Tabata tin un situacion 50/50, pero e situacion a bira 70/30. A bisa cu apesar di esey, ta APA su baby. Sindicato STA lo bay bringa pa e empleadonan di APA y ta spera cu por sali satisfactorio for di e negociacionnan aki.
