September aña pasa e sindicato STA a gana un referendum pa e tambe representa trahadonan di nos compania nacional distribuido di coriente, esta N.V. Elmar. Esaki a bira e di 3 sindicato den e compania, banda di sindicatonan UEA y ALVAST. E problema ta cu nan a yega y topa cu un contracto colectivo di trabou (CAO) vigente y kier cambi’e. Ley no ta permiti esey y awor STA ta boga pa bula cabes di e director, Ing. Robert Henriquez.
For di September pa awor, e sindicato a sinta cu gerencia mas o menos 3 biaha, di acuerdo cu un fuente den NV Elmar. E problema ta cu a priminti e trahadonan varios mehoracion, pero cu awor no por cumpli, debi na w CAO vigente.
Un di e puntonan principal ta e areglo di salaro minimo y maximo. Den e acuerdo, NV Elmar y UEA a acorda cu e funcion tin un salario minimo y tin un maximo den e funcion. Esaki pa evita manera den pasado, cu trahadonan sinta riba e mesun funcion ta sigui crece y haya aumentonan te cu e salario pa e funcion ta bira desproporcional.
Sindicato STA tin intencion pa habri e contract colectivo di trabao for di otro, aunke cu e ultimo CAO firma pa e sindicato UEA, ta vence te na aña 2020. Un paro laboral cu consecuencia pa e funcionamento di e compania of strobando suministro normal di coriente na clientenan, sin duda lo conduci na casonan legal den Corte y cu consecuencia financiero tanto pa e sindicato como tambe pa e empleadonan.
Gerencia di NV Elmar a haci tur lo posibel pa cera un bon CAO pa su trahadonan 2 aña pasa, cu e acuerdo cu e tin un duracion di 4 aña. Den caso cu e empleadonan a opta pa cambia di sindicato of afilia na un otro sindicato, no por cambia e acuerdo firma entre e partidonan.
