Cada biaha e relacion internamente den Dr. Horacio Oduber Hospital (HOH) ta empeora. Desde nombracion di Ezzard Cilie a bira bisto cu e forma di comunica internamente no ta gana un premio, pio su relacion den gerencia. A conduci na laga Theo de Kool bay, pero maneho no a drecha. Al contrario, awo a yega asina leu cu 74 Specialista afilia na e Asociacion di Specialistanan ASHA, a firma un carta cu por considera como un “mocion di desconfiansa” contra e nurse cu na caminda a bira Director di di Hospital.
Den un carta manda dialuna, e Asociacion di Specialistanan di Hospital di Aruba (ASHA), ta manifesta nan preocupacion pa e decision y e funcionamento den multiple nivel dentro di hospital y den e Hunta di Directiva (Raad van Bestuur) en particular, “cada biaha ta faya mas y structuralmente, cu consecuencianan (potencialmente) desastroso.
Sin embargo, e specialistanan ta bisa cu nan kier yega na Cilie pa haya solucionnan adecuado y aceptabel, pero enfatisa cu si no ta suficientemente conoci pa nan cuido, nan lo sinti nan mes obliga pa nan etica profesional, bay bati na porta di Inspectie Volksgezondheid Aruba (IVA) pa expresa nan inkietud.
“Sin adaptacion y mehoracionnan structural den henter e organisacion, cada biaha ta bira mas dificil pa por brinda sosten na e Raad van Bestuur,” segun ASHA cu ta haya cu e Hunta di Supervision, encabesa pa Gino Goeloe ta retrasa y hopi biaha of tin biaha no ta pone nan na altura di decisionnan.
E grupo di interes tin un lista di preocupacion parti den seis tema principal, unda ta kere cu e organisacion ta faya.
- Prome cos ta e construccion y e renobacion di Hospital.
- ASHA no ta contento cu e director financiero, Theo de Kool, a renuncia su funcion.
Di acuerdo cu ASHA, hopi caso no a wordo resolvi na tempo y e decisionnan no a wordo tuma na tempo, pero awo cu Ezzard Cilie ta na mando, ainda ta keda asuntonan mas esencial y e decisionnan crucial, hopi biaha riba e campo financiero, ta wordo posponi. Raad van Toezicht (RvT) a indica cu nan lo brinda apoyo na gerencia, pero ASHA ta bisa cu ainda no a nota nada y ta pidi e reclutacion rapido di un director financiero nobo.
Awetardi e Raad van Toezicht a reuni cu Raad van Bestuur (Gerencia) di Hospital riba e kehonan aki. E intencion ta pa despues di e reunion informa comunidad di e futuro di Dr. Horacio E . Oduber Hospitaal.
ASHA a avisa riba e forma inadecua cu ta recluta specialistanan nobo. E vacaturanan ta wordo poni demasiado laat of te hasta, no ta wordo poni. ASHA ta preocupa pa e posibel fayo den atrae un reemplaso pa e oncologo/hematologo Roel Jonkhoff na tempo. E hecho cu e specialistanan ta yuda otro mutuamente, no ta wordo aprecia pa RvB y segun ASHA hasta ta enfrenta oposicion y e tratamento y orientacion di e specialistanan nobo ta laga hopi di desea.
E departamento di personal no ta adecuadamente gestiona. Ademas ASHA kier mira un mehoracion den e emicion di permiso di trabao pa specialistanan stranhero. Actualmente, algun specialista ta trahando sin permiso y ni sikiera nan ta registra cu AZV.
ASHA ta seriamente preocupa pa e compra di material y medicamento y mantencion di inventario. No tin suficiente coordinacion.
E calidad di e laboratorio di Hospital ta bao di hopi presion, ASHA ta haya. Testkits hopi biaha no tin, resultadonan externo ta perde of no ta wordo manda y e sistemanan critico, manera mididonan di gasometria, ta faya regularmente. “E cantidad di calamidadnan ta aumentando, en parte debi na e uzo di ekiponan altamente desactualisa y e despliege di personal no experencia.”
Durante hopi tempo a conseha pa cambia pa un sistema electronico di prescripcion pa remedi. ASHA ta sigura cu ta comete un gran cantidad di fout casi tur dia cu e sistema di papel actual. Den varios caso, esaki tambe a provoca calamidad, segun ASHA.
ASHA kier mira un plan di maneho integral pa Hospital, unda ta scucha. Den e carta, e specialistanan ta duna e director medico Ezzard Cilie un siman di tempo pa duna un contesta. Si esaki no sosode, lo tuma mas paso.
