Ley ta brinda oportunidad pa Huesnan duna conseho ki ora TBS tin cu cuminsa

E caso di speeltuin ta uno cu basta eventualidad. Hasta buelo e huesnan cu mester a bin atende e caso, nan a perde. Abogado Demis Illes, a comenta cu e caso a cuminsa mainta y a caba banda di merdia. Hof a trata e caso den full su esencia un biaha mas. E apelacion a bin di parti di e cliente mes, den e caso aki. Tin cu bisa si cu no ta un caso cu Illes mes ta directamente e abogado di e sospechoso Gabriel Martin, pero si esun cu ta asisti e abogado di Hulanda.

Basicamente e esencia di tur e cos aki si semper tabata pasobra e cliente a bisa biaha pasa cu e ta acepta su castigo. E ta compronde. E esencia di tur e cos aki tabata con ta cualifica con el a pasa, pero mas esencial ainda tabata pa wak si por yega na convence hof pa pone un fecha pa cuminsa tratamento di e persona di TBS. E ta realisa su mes cu e mester di ayudo. Ley ta brinda e oportunidad pa huesnan duna un advies pa ki ora TBS tin cu cuminsa y e ta logico cu mas lihe cuminsa, mas e chens cu e ta exitoso, ta bira mas grandi.

Den e caso aki hues den corte di prome instancia, apesar cu e colega di Hulanda a pidi pa esaki, no a ni tuma un decision den e parti aki, no a bisa nada. Esey tabata e esencia cu a bolbe pidi pa bin cu e caso den hoge beroep.

TBS

Segun abogado Illes, TBS ta bay bao di un sorto regimen. Psicologicamente bo ta wordo yuda. Na Aruba nos no tin un TBS kliniek. No tin na Corsou, no tin den e region tampoco. Te awor aki, e sistema ta cu bo lo mester bay Hulanda tambe pa e ora ey nan haci’e. Esey ta un di e problemanan si cu enberdad tin. Tin di compronde di gobierno cu ta e intension cu di un forma, si ta Aruba so, of ta conhuntamente cu e otro islanan ta forma un TBS kliniek. Pero ta cosnan cu a bin dilanti durante tratamento di apelacion. Awo tin cu warda cu gobierno su apelacion con pa sigui cu esaki. E esencia di e pleidooi tabata pa wak toch si tin den algun forma cu por cuminsa cu e tratamento mas lihe posibel.

Castigo

E cliente a haya un castigo di 15 aña. E parti ey e tin cu atende cun’e, con cu para. Loke si ta TBS, no tin un fecha cu e ta vence of algo asina. E ta vence na momento cu un psikiatra den e caso aki of e dokter en todo caso cu ta trata e cliente, ta declara cu e ta suficientemente na sano huicio bek y no ta un menasa pa sociedad mas, cu bo por wordo resocialisa. Esey ta e momento cu por declara cu ta apto pa bin bek. E ora TBS por wordo para y ta yega na su fin.

A pidi pa bay

Hopi biaha e cliente a pidi pa bay Hulanda. Segun Illes, e cliente tin su deseo pa sinta su castigo na Hulanda, pasobra e ta bisa cu djey nan e ta bin y eynan su famianan ta biba tambe. Ta un peticion ta haci na Hulanda, cu Hulanda tin cu tum’e y wak si ta acepta pa haci’e. E otro parti ta e cuestion di TBS. Si awor aki pone un fecha con lo mester ehecuta esey.

Ta compronde cu tin partinan fastioso cun’e di logistica cu no tin e infrastructura na Aruba. Pero como parlamentarionan, tur a boga pa bin cu TBS, a bin cun’e, e ta un posibilidad. Awor aki, e mesun estado cu ta bin cu e ley aki, mester percura pa tin e infrastructura pa brinda esey tambe.

Un tercera parti

Tur castigo cu haya, comporta bo mes, ley ta duna loke ta yama e derecho di VI. Si den e caso aki, si ta 15, asumiendo cu e cliente ta comporta su mes, den 10 aña, e ta bin na remarca pa wordo laga den libertad. Si e momento ey tambe, normal un hende lo a bay den libertad, si tin TBS den cabes e ora e ta bay kick in e momento ey. Esencia ta si, kier pa e TBS kick in mas tempran, den e sentido di purba. Si tarda, aki 10 aña e pregunta con e persona aki lo ta y si e ora ey por bay cuminsa trat’e si lo logra ainda.

Mara na tempo?

TBS no ta mara na tempo. Tin casonan conoci na Hulanda cu hendenan te dia di awe, ta den TBS. Esey ta e parti di TBS. TBS ta caba na e dia cu e persona wordo declara cu e ta den sano huicio.

Huesnan

Desde dialuna cu a pasa, despues di tres siman, lo bay tin sentencia. E tres huesnan a scucha. Por a mira cu nan tabata tin interes di loke a wordo bisa. Nan no a duna ningun indicacion kico nan a pensa.