Frakshon di PAR ku asombro a tuma nota ku Kòrsou su partisipashon den e tratado yamá ‘Status of Forces Agreement’ (SOFA) den Tweede Kamer a keda strobá konsientemente pa Partido Sosialista di Hulanda (SP).
Esaki apesar ku Hulanda mes pero tambe Aruba i St. Maarten si ta forma parti di e tratado aki for di aña 2012 te ku aña 2023. Frakshon di PAR no ta spera ku e sakamentu di pia aki di SP ta un stùnt polítiko pa e kampaña elektoral na nivel provinsial ku tin na Hulanda na e momentonan aki.
For di aña 2005 te ku aña 2012 Kòrsou a partisipá den e tratado di SOFA. E tratado aki ta regla ku personal militar di Merka por hasi uso di e fasilidatnan di Kòrsou pa train. Esaki tin komo benefisio entrada di divisa pa Kòrsou i tambe oportunidat pa nos propio milisia hasi trainingnan en konhunto ku esun di Merka. Na 2012 e tratado a kaduká i a base di un desishon di gabinete Schotte esaki no a keda renobá lagando Kòrsou pafó di e tratado komo úniko Pais den Reino. Esaki a hiba komo konsekuensia ku Kòrsou a pèrdè añanan balioso di posibel entrada mientrastantu Hulanda, St. Maarten i Aruba si a sigui hasi uso di e tratado di SOFA.
Ademas ku e gabinetenan anterior a skohe pa un maneho di eksklushon i no kolaborashon. Na mart 2018 Gabinete Rhuggenaath a revisá e omishon aki i hasi un petishon pa Kòrsou partisipá den tratado atrobe. Konforme areglonan di Reino e tratado e ora ei mester a bai Tweede Kamer pa aprobashon. Ta den tratamentu di esaki i for di ‘left field’, partido SP di Hulanda a tuma un posishon kuestionabel, lamentabel i defakto diskriminatorio pa wanta entrada di Kòrsou den e tratado di SOFA ku por lo ménos dos aña. Sin tene kuenta ademas ku mas pais ta partisipá den training militar na Kòrsou òf den awanan teritorial di Kòrsou, inkluso warda kosta di Venezuela. I ku durante orkan Irma Kòrsou a fungi komo hub humanitario pa forsanan armá di Reino, Gran Bretaña i Fransia.
Pa frakshon di PAR hustamente e tipo di moveshonnan asina aki ta mustra riba e nesesidat di un areglo di disputa i/of un Hof Konstitushonal i/o un parlamento di Reino. No por ta asina ku un partido den tweede kamer ta bin ku un stùnt polítiko unda Kòrsou ta wòrdu usa komo pion polítiko na Den Haag. P’esei frakshon di PAR den e trayekto di IPKO lo keda vigilá ku wowo di falki pa bin ku mas areglo i institushonnan riba nivel di Reino ku ta garantisá mas igualdat entre e paisnan outónomo i pa deshasí di e défisit demokrátiko ku ta reina awor aki kaminda un partido hulandes ta intervení den asuntunan di nos pais, sin partisipashon di nos banda.
