Durante un conferencia di prensa Sony/ATV Music y Palms Up Record a haci un anuncio cu ta brinda un oportunidad unico na talentonan local. E acuerdo entre e dos companianan aki ta brinda mas chens no solamente na talentonan local pero tur e islanan ABC.
Michael Lampe, director di Palms Up Record, a cuminsa pa bisa di ta sinti un orguyo masha grandi. “Un soño ta bira realidad pa mi y tur talentonan di islanan ABC. Ta prome biaha a lanta un record label riba Aruba cu hopi potencial talento di nivel internacional.”
A traha basta tempo pa yega na e punto aki, Lampe a splica. Asina a yega na un acuerdo mundial cu Sony / ATV. Nan ta un compania di musica, pero awo a firma un acuerdo ta partner cu Palms Up Record pa cual unabes cu un artista local firma cu e compania di Michael Lampe, ta haci cu e talentonan ta firma tambe cu Sony.
A presenta un declaracion via internet di e director di Sony / ATV Music, Niels Walboomers, kende a expresa di ta contento di por yuda talentonan local yega na e plataforma internacional.
Lampe a informa tambe nan tin cooperacion cu e productor di taya internacional di Hulanda, esta Mau, Morris y Jeremiah. Nan tur por trece talentonan y habri oportunidad nobo riba plataforma internacional pa e artistanan.
E talentonan mes cu a firma cu e dos empresanan di musica ta: Kriss.YO, Suhcy,Freddy Rasta, Lucius, Speedy, Ginger, CATA.PIRATA y Nicole Manz.
Den tur e proyecto aki ta importante un “publisher” cu ta pusha e carera di artistanan. P’esey Palm Up Record y Sony / ATV Music ta e combinacion perfecto.
Ta trata e musica na Aruba y e masterizing ta tuma luga pafo di Aruba. Na final for di e plataforma local e ta bay pa mundo.
