SMOA y Obispado ainda no a yega na otro

530

E peticion di Obispado na miembronan di directiva di Stichting Middelbaar Onderwijs (SMOA) pa tuma honor na nan mes y retira, no a haya oido. For di medionan di comunicacion a lesa e reaccion di SMOA cu nan ta bisa cu no tin motibo pa retiro. Awo a reuni dialuna pa mira cual ta e siguiente paso.

Andres Makowiec, Vicario Episcopal na Aruba pa Obispado di Willemstad, a comenta cu nan tin tres luna caba papiando cu SMOA despues di a surgi hopi malcontento bou docente y comision di mayornan. E situacion a explota na momento cu un otro rector a tuma su retiro.

SMOA y Obispado ainda no a yega na otro

SMOA y Obispado ainda no a yega na otro. Click link pa mas https://24ora.news/3gWX8jl

Posted by 24ora on Tuesday, July 14, 2020

Pa Obispado ta hopi importante bienestar di e studiante- y docentenan. Mirando cu e ta un instituto catolico, Obispado ta trata di wanta su envolvimento den esaki y cu e problemanan cu a surgi ta trata di yega na un solucion y a tene algun reunion den cuadro di esaki. “Sin cambio di directiva ta pa nos papia di un ambiente sano, unda docentenan por cumpli cu nan trabou y studiantenan ta haya les den un ambiente sano.”

Diacono Michael Nicolaas a enfatisa cu Obispado kier transparencia y apertura, pero ora cu ta papia di transparencia, e mester bini di tur dos banda, respet pa ambos banda. Mester pone tur interes personal un banda, laga e parti di orguyo of otro sentimentonan un banda, sinta scucha y wak con pa yega na un solucion. “No mag di lubida cu Colegio a lanta cu un fundeshi catolico mas cu 60 aña pasa. Frerenan cu tabata traha e tempo ey na forma nan intencion tabata pa bini cu un formacion pre-universitario pero semper cu base catolico y habri pa tur religion,” Nicolaas a splica. El a bisa cu ta sigui ta optimista y habri pa sugerencianan pa yega na un solucion. Mester tene cuenta cu tin momento cu cambionan di direccion mester wordo haci pa por logra e meta cu mayor, docente y studiantenan lo beneficia di dje.

Tin un rector nobo caba pa e aña escolar nobo y awo mester tin sano huicio pa sinta, respeta otro y combersa cu otro. Interes general mester prevalece, apesar cu  situacion ta uno compleho.

Ambos a bisa cu nan Obispado a sinti nan mes obliga y cu responsabilidad moral pa interveni den e problemanan aki. Lo sigui traha pa yega na un solucion, un entendimento. P’esey ta apela na e directiva pa un reunion. Representante di Obispado ta habri pa ricibi nan y dialoga.