Recientemente Minister di Enseñansa y Deporte, Endy Croes, a reuni cu e directiva diario di e organisado di carnaval, SMAC. Despues di e reunion a catalog’e como un encuentro ameno. Presente tabata presidente di SMAC, Darren van Ommeren y secretaria di SMAC, Edelysse Nicolaas.
Durante e reunion a dialoga riba diferente puntonan importante pa cu carnaval di Aruba. A intercambia idea y e preparacionnan pa carnaval 2023. Como tambe a papia di e vision di e directiva nobo pa e fiesta cultural di mas grandi di Aruba.
Manera e posibilidad pa engrandece carnaval di mucha, pa sondea e posibilidad con scolnan por coopera cu esaki y asina wak si tin mas grupo di scol cu por incorpora den carnaval di mucha.
E di dos punto cu a bin pa dilanti ta e posibilidad pa SMAC tin su propio oficina, un luga unda cu nan por opera. Na e momento aki SMAC no tin un luga fiho.
Gobierno a keda di atende e asunto aki internamente pa despues duna SMAC un contesta definitivo riba e puntonan atendi.
