Aruba Marriott Resort & Stellaris Casino pa 6 luna largo a organisa un competencia, “Slim to Win”. Desde e momento cu Marriott Resort a anuncia e ‘challenge’ di “Slim to Win”, mas o menos 22 empleado di tur 3 propiedad a inscribi.
Interesadonan a pisa y huradonan a scucha cada un nan storia pa asina na final a scoge 6 participante. E participantenan a haya guia pa 6 luna con pa hiba un estilo di bida mas saludabel.
E participantenan a ricibi training di psicologo, nutricionista, personal trainer y dietista. A cuminsa 6 participante pero lamentablemente un di nan no a alcansa yega te final. A keda 4 participante femenino y 1 masculino. E participantenan scogi tabata di diferente departamento, cual 2 tabata di Resort, 1 di Ocean, 1 di Surf y 1 di Casino. E participantenan ta Ericson Maduro, May-Ruby (Annie) Kock, Naomi Chayadi, Terry Florez-Davis y Prenia (Lala) Pierre.
Tur a haci un test medico, di cual a check nan estado di salud. E nutricionista Johanna Stroo 2 biaha pa luna a pone nan riba un programa di comemento, incluyendo un “detox”. Tambe a bay cu nan Ling & Sons pa un “Supermarket Tour”. Nan tabata train 3 biaha pa siman bou encargo di “To Be Fit Studio”. A haya les di cushinamento saludabel y hopi mas, unda cu por nota cu nan a baha peso. E participantenan a ricibi ayudo psicologico di Judeska Briceño durante 2 biaha pa luna.
Ericson Maduro ta empleado di Stellaris Casino y ta representa e casino. El a indica cu e reto aki a cambia su persona hopi. “Mi ta sinti mi mes mas saludabel. Mi ta orguyoso di mi mes aworaki”, asina el a expresa. Loke cu nunca el a logra, Ericson Maduro a logra esaki den 6 luna. Tur esaki ta danki na e guia profesional cu el a ricibi for di nan y esaki a cambia su bida completo.
“Slim to Win” a cambia e estilo di bida diario di May-Rubi Kock, kende ta traha den administracion di e departamento di ingenieria. “Mi ta enfoca pa come basta saludabel, pasobra e cambio no ta facil di un dia pa otro pa bay e estilo di bida saludabel”, el a expresa. Awo e ta haci ehercicio y e ta contento cu e cambio aki.
Naomi Chayadi di “Events & Banquets” a cambia su bida, unda cu awo e ta lanta mas trempan y durante dia e ta mas pendiente di kico e ta come y con hopi awa e ta bebe. Tambe e ta percura pa ta mas activo mainta of atardi. Esaki ta un cambio completo, Naomi Chayadi a expresa.
E reto aki a cambia tur cos pa Terry Flores-Davis, trahando den e departamento di Recursonan Humano di e hotel. “Mi a cuminsa enfoca mas riba cumindanan saludabel”, el a expresa. El a cuminsa incorpora esey den tur cuminda cu e ta come, pero tambe hunto cu su casa y yiunan cu a bira algo den famia. Tambe e rutina di training, di cual el a incorpora esaki 3 bes pa siman. “E challenge ta caba, pero nos ta sigui riba dje. Pa mi el a bira un bida saludabel”, el a expresa.
Prenia (Lala) Pierre, supervisor di housekeeping di Surf Club Aruba, ta contento di e oportunidad cu el a ricibi pa participa den e challenge “Slim to Win”. E reto aki a pone cambia su estilo di bida pa tin uno mas saludabel. “Danki na Marriott cu a bin cu e reto aki. E oportunidad aki a yuda mi persona y mi coleganan pa tin un bida saludabel”, Prenia Pierre a expresa.
Dia 4 di December ta e dia final di e challenge y Marriott lo saca un prome y di dos luga di e reto di “Slim to Win”. E ganado di prome luga lo ricibi 350 florin pa luna pa haci compra na Ling & Sons pa 1 aña y “4 nights stay” na cualkier hotel di e famia Marriott na Aruba, mientras e di 2 luga lo ricibi 250 florin pa luna pa haci compra na Ling & Sons pa 1 aña y “2 nights stay”. Lo saca e ganado a base di esun cu a perde mas porcentahe di “Body Fat” den e ultimo 6 lunanan.
Marriott Resort a habri na Aruba na aña 1995 cu 413 camber. Na aña 1999 a habri Ocean Surf Club cu 311 camber y na aña 2004 a habri Surf Club cu 450 camber. Na tur, e famia di Marriott Aruba ta consisti di mas o menos 1100 empleado den servicio directo y 400 empleado trahando via otro companianan den e compleho di hotelnan. E compleho di Marriott Aruba ta esun di mas grandi den henter Caribe, tanto den cantidad di camber como den cantidad di empleado.
