Durante e siman ku a pasa pueblo di Aruba i Kòrsou a keda di un forma desagradabel sorprendí pa un kaso mas di abuso i violensia kontra di mucha. Sra. Pauletta di frakshon di PAR a bishitá nos pais ruman Aruba mesora despues di e suseso pa mustra sosten. I ku un sentido di pésame, a tuma nota di e doló di di e pueblo di Aruba pa e suseso lamentabel aki, kaminda dos mucha inosente a pèrdè nan bida di un forma horibel.
Esaki no ta un kaso isolá, si no ta kasonan ku ta pasa ku un regularidat espantoso, tantu na Aruba, komo na Kòrsou. Pa e motibu aki mes sra. Pauletta a bai Aruba pa tuma nota di e pasonan ku ta wòrdu tumá dor di gobiernu i tambe asistí na e konferensia di ‘ Violensia Doméstiko den Reino Hulandes’ ku pa koinsidensia tabata tumando lugá na Aruba.
Sra. Pauletta ta manda un palabra di gradesimentu na fundashon ‘Pa Hende Muhé den Difikultat’, ku a organisá e konferensia aki, huntu ku partnernan sosial i gubernamental di henter Reino Hulandes. Sra. Pauletta ta reiterá, ku ta su konvikshon ku tin ku evitá mas kaso di violensia i abuso di mucha, ni un mucha mas no por bira víktima di violensia. Tur forma di abuso i violensia ta kastigabel pa lei i nos mester por garantisá ku esunnan ku ta hasi nan mes kulpabel na esaki wòrdu kastigá pa lei. Esaki ta un aserkamentu dual, kaminda ta traha riba prevenshon i represhon. Den kuadro di esaki sra. Pauletta tabatin un kombersashon ku Procureur General di Aruba, sr. Van Dam i tambe ku sra. Richardson, direktor kas di Sokoro di St. Maarten, ku próksimamente lo ta na Kòrsou.
Ta un echo ku den mayoria kaso di abuso i violensia kontra di un menor di edat e agresor ta un familiar i/òf un konosí. P’esei tin ku reforsá prevenshon na nivel familiar. Nos famianan mester haña mas atenshon pa loke ta trata kuido sosial. Instansianan gubernamental i fundashonnan sosial ku ta traha ku famia mester bai haña mas atenshon, finansiero pero tambe oido pa nan kehonan. Sra. Pauletta ta indiká ku nos núkleo familiar ta pilar di nos sosiedat i esaki mester ta unu sano.
Segun sra. Pauletta un persona, kualke persona mester por hasi denunsia na polis di kaso nan di abuso i violensia di forma anónimo regla den lei. Tambe víktimanan di violensia i abuso, si nan ta deseá esaki mester tin e espasio den lei pa ekspresá nan mes durante e proseso di korte. E agresor nan mester por wòrdu èkstra for di nan kas familiar i haña un ‘huisverbod’.
Frakshon di PAR den su afan di sostenélo kuminsá traha riba e diferente proyekto nan di leii entre otro lo monitorea e proseso pa fortifiká e ofisina di ‘Centrale Meldpunt Kindermishandeling (CMK)’ huntu ku e liña di telefòn pa mucha ‘918’. Proksimamente sra. Pauletta lo saka un karta pa Minister di SOAW pa informá tokante e maneho sosial dirigí riba e núkleo familiar i unu pa Minister di Hustisia pa informá tokante e maneho pa ku CMK i telefòn pa mucha.
Nos ta bai logra ku ni un mucha mas ta bira víktima di abuso relashonal solamente si gobièrnu traha di forma inter-ministerial i kada instansia forma huntu un kadena di kuido.
