Sjeidy Feliciano, Area Director North America, ta forma parti di e delegacion di ATA cu ta participa den e conferencia Routes Americas 2024. Su participacion na e conferencia ta importante, mirando cu Merca ta e mercado di mas importante pa Aruba y ainda tin interes pa esaki crece.
“Tur cos ta mustra positivo pa e mercado Mericano (cu ta inclui Canada). E cifranan preliminar ta mustra hopi bon. Nos ta realisa logronan basa riba e strategia cu nos a hinca den otro.”
E branding cu ta uza “The Aruba effect” ta hala hopi atencion.
Feliciano ta sinti e experiencia na Bogota, uno full diferente, unda ta siña di e aerolineanan, haya conocemento di nan plannan a corto y largo plaso, nan meta y strategianan. “Nos ta traha hopi di cerca cu e aerolineanan riba diferente programa, manera e influencers program, pa yega na e mercado cu nos kier pa e hendenan haya sa kico Aruba tin di ofrece.”
Riba e prome dia a tene un reunion masha importante cu e aerolinea JetBlue, cu ta esun mas grandi pa Aruba. Loke a scucha eyden ta cosnan positivo solamente. Aunke tin hopi aña cu JetBlue, e entusiasmo pa cu Aruba no a baha. “Nan ta contento cu loke Aruba ta ofrece … Pero nos ta contento pa scucha cu e ruta di Aruba ta hopi bon pa e compania. Nan no tin pensa pa baha e cantidad di vuelonan. Alcontrario, nan ta studiando kico mas por haci hunto den futuro.”
El a confirma cu ta traha riba otro mercadonan. Ta haciendo estudio riba otro mercadonan unda cu no tin vuelo directo pa Aruba, pero cu e hendenan ta dispuesto pa coy conexion (hub). No por logra tur estado, pero ta busca aeropuertonan grandi y e premium leisure traveller.
