Sindicatonan representando trahadonan publico, entre otro SADA, SIMAR y SPA, hunto cu demas sindicatonan SINBA, TOPA y SEPPA, a reuni cu formado mr. Evelyn Wever-Croes, den cuadro cu formacion di un gobierno nobo.
Durante e reunion aki e sindicatonan a sa di probecha e ocasion pa discuti entre otro e landspakket y tambe a trece dilanti nan puntonan den preocupacion.
Edward Maduro, presidente di SADA a expresa cu lo warda e gobierno forma oficialmente pa asina sigui dialoga, mientras cu presidente di SIMAR, Josephine Albertus a splica cu di nan parti nan a entrega un documento, subrayando di e cosnan cu tin cu cambia.
Durante di e rueda di prensa net despues di e reunion, Albertus a menciona cu no por sigui corta, pasobra sin fondo no por trece cambio. Pa por bisa esey, mester sinta hunto. Tur momento cu a pidi pa haya transparencia, a haya sumanan grandi y cu sumanan grandi no por bisa hopi. Mester haci mas analisis prome cu yega asina leu y mira kico ta cay bao di e presupuesto di e aparato publico. E ora ey por bin cu cortamento realistico cu por logra tambe, na luga di bisa un cos y despues di analisis, esey no ta posibel.
Pa cobertura mas amplio, lesa e edicion di TREMPAN mañan.