No ta un secreto e situacion penoso cu e polisnan na warda na Oranjestad ta pasando aden. Ta pa un tempo caba nan ta trahando den schimmels. E situacion aki a afecta salud di varios polis.
Rodney Solognier, presidente di Sindicato di Polis Aruba (S.P.A.), a duna di conoce cu conhuntamente cu leiding di polis ta en busca di un luga pa muda mas pronto cu ta posibel for di caminda cu nan ta. Solognier a comenta cu e doñonan di e edificio caminda Consulado di Venezuela tabata situa a yam’e y diabierna atardi e miembronan di e sindicato a pasa den Paardenbaaistraat pa tira un bista. Nan a pasa wake edificio conhuntamente cu algun hende di beheer, hunto nan a pasa wak e edificio pa wak si e ta cumpli cu tur e rekisitonan.
Presidente di e sindicato a indica cu e edificio ta completamente renoba, pues e ta practicamente nobo. Solognier a continua bisando cu e edificio lo por ta un posibilidad pero te ainda nan no sa si esaki mes lo ta e escogencia.
Tin mas opcion
Solognier a comenta cu el a tende cu tin opcion riba mes pero te ainda e no bay wak nan ni tampoco a ricibi invitacion pa haci esaki. El a compronde cu ex-Domein Beheer situa den cercania di aeropuerto tambe ta un posibilidad mirando cu e ta completamente renoba. Alabes el a compronde cu e edificio caminda Setar/Cable tabata, tambe ta un opcion.
En busca di solucion
Solognier a continua bisando cu e sindicato no ta unicamente critica pero tambe ta duna nan aporte pa por yega na un solucion, pasobra na momento cu soluciona un problema e miembro- y coleganan por traha contento. Pasobra, segun Solognier, na final di e storia ta nan salud ta na peliger.
Kico mester tene cuenta cu ne
Na momento cu ta busca un edificio mester tene cuenta cu algun rekisito mirando cu e no ta un kantoor comun, esey ta pone cu algun edificio ta cay afo como opcion. Presidente di e sindicato a avisa leiding di e edificio den Paardenbaaistraat y nan mes a yega pa wak.
Trahando pa e miembronan
Rolando Maduro, vice-presidente di e sindicato, a indica cu e miembronan por ta contento y satisfecho pasobra nan ta buscando un solucion pa yega na un edificio adecua. Un di e rekisitonan ta cu tur locual cu tin paden di e edificio mester ta nobo. El a indica cu no ta posibel pa sali for di un edificio cu schimmels y bay cu por ehempel e mueblenan pasobra no sa ta unda tur e bacteria ta.
