Un delegacion di sindicato SINBA (Sindicato di Bomberonan di Aruba) a reuni diamars atardi cu Minister di Husticia bou cual cartera Cuerpo di Bombero ta resorta, Tabatin diferente tema riba agenda pero e principal tabata malcontento di Bomberonan pa e forma cu a scoge dos officier pa sigui un curso den exterior (Corsou). E tabata un lista largo di peticion na Minister Andin Bikker.

Directiva di SINBA a cuminsa haya e informacion aki siman pasa diahuebs pa cual e miembronan kier a duna un protesta di un ora riba diadomingo pa mustra nan malcontento.

Sindicato di Bomberonan cu lista di peticion na Minister Bikker

Sindicato di Bomberonan cu lista di peticion na Minister Bikker. Click e link pa mas

Posted by 24ora on Tuesday, November 5, 2019

Diamars a reuni cu e Minister y a papia riba e dos officiernan cu a bay Corsou. SINBA tabata kier un splicacion con e procedura di seleccion a tuma luga. Tin hopi regla pa sigui, asina por ehempel pa ocupa un funcion den Cuerpo di Bombero, esaki ta mara na educacion, rango y añanan di servicio.

Pero nan tin mas preocupacion. Nan trucknan ta den mal estado, e opleidingnan no ta cana manera mester ta, pues ta atrasa; promocionnan ta cana atras; mester introduci cambionan pa un mehoracion den funcionamento. SINBA tin basta tempo ta pidiendo pa un “gevarenpremie” no a bini ainda, tin necesidad di vehiculonan nobo pa paga candela. Pero tambe tin necesidad pa un post di Brandweer na Santa Cruz, segun Roza a bisa. Tin un cambio cu kier haci den e ley di Cuerpo di Bombero sin consulta cu nan. A pidi atencion di e mandatario riba esaki. A pidi un Plan di Maneho di 2013 pa 2019; e bon di cuminda cu no ta bon regla; tin un grupo cu tin problema cu nan salario, cu mester drecha; kier lanta e duikteam bek.

Pero tambe nan a pidi atencion pa nan edificio y nan mobilarionan di cual mayoria ta data di 2012, y mayoria stoel ta kibra.

Na final a palabra cu otro siman diahuebs mester tin un reunion pa sigui atende cu e temanan aki, pa mira kico a haci caba y kico por haci ainda.

Tur e peticionnan aki ta nifica gasto pa Gobierno. E mandatario, segun Roza, mester sinta cu su team financiero pa mira con ta bay atende cu tur e puntonan aki pa loke ta e parti financiero.

Na juli ultimo tabatin eleccion di sindicato di SINBA y despues cu el a hala atras na 2013, a haya peticion pa bolbe y esey ta loke a sosode. 

Comments

comments