Edmarc Kock ta un studiante Rubiano na Rotterdam University of Applied Sciences. E ta haciendo su estudio den rango di Consultancy & Entrepreneurship. Edmarc ta haciendo su Masters Program di 1 aña, anto awor e tin dos luna bayendo caba den dje. Na Aruba el a studia na Universidad di Aruba den programa di OGM cu ta un programa di 4 aña, cual el a termina november 2023 anto a dicidi di bin Hulanda pa haci su Masters.
“Mi ta purba di planifica mi cosnan adelanta, mi stapnan pa futuro y mi metanan cu mi tin.”
Tabata tin un competencia recientemente unda diferente universidadnan a colabora hunto den Europa, cu diferente studiante a traha riba e proyecto. E proyecto tabata un competencia tambe pa eigenlijk yuda gemeente di Rotterdam pa inclui tur hende den era digital.
Riba 15 di Maart 2024 a tuma luga e clausura di e proyecto “Sustainable Pressure Cooker” unda dus tabata tin e colaboracion aki di studiante den diferente universidadnan entre otro masterstudents di Rotterdam University of Applied Sciences, Vilnius University y Worms University of Applied Sciences. Tabata tin un total di 11 grupo cu presenta nan solucion pa un “Civic AI Lab” cu ta pone enfasis riba inclusion digital.
E grupo cu e solucion cu mas a resalta cual a resulta ganado tabata: SimplifAI. E grupo ta consisti di Sandeep Deb Varman, Bram Hooglandt, Hana Toloueifar, Mario Montag, Luka Pantic, Fatma Sever y studiante Arubiano; Edmarc Kock. Edmarc a presenta nan solucion dilanti un cuerpo di hurado cu ta consisti di representantenan di Gemeente Roterdam y professor universitario.
E solucion cu Edmarc y su grupo a trece dilanti a sobresali pa motibo cu e ta simpel y realisabel, pa es motibo nan a scoge e nomber “SimplifAI”. SimplifAI tin como obhetivo pa inclui mas hende posibel den e mundo digital, door di manda un comunicado cu ta guia nan den un manera simpel con pa haci uzo di tecnologia den nan bida diaro.
Edmarc kier a gradici tur persona cu a yud’e y na mes un momento curasha tur hende pa continua cu nan estudio y logra nan metanan.
Edmarc ta bisa cu tiki tiki e ta sinti cu e hendenan grandi ta yegando un tiki mas cerca den confia tecnologia y rednan social anto haci uzo di pagonan online. E hoben kier drenta e arena di Consultancy, purbando di bati na porta di diferente compania na Hulanda p’un oportunidad cu un Rubiano tambe por haci un tremendo trabao den esaki na Hulanda. Anto e consideracion pa bay bek Aruba despues di a logra haya mas experiencia y conocemento na Hulanda ta uno cu sigur ta presente pa Edmarc, kende ta afirma cu ‘semper lo mi kier duna bek na mi tera. Mi kier yega Aruba bek pero mi kier yega cu mi papelnan y experiencia pa duna di mi parti.’
E hoben ta conseha tur hoben pa tin un plan si nan ta desea pa bin Hulanda pa studia, traha un plan pa asina sigui cu e pasonan di bo plan no ta importa kico bo kier haci sea ta masters y busca mas experiencia internacional. “Pa tur esnan cu kier haci bachelor na Hulanda ami lo bisa pens’e bon. Mi stapnan tabata haci mi bachelors na Aruba, gara e conocemento ey anto despues tuma e stap di bay un tiki mas internacional, y ata mi aki na Rotterdam.”
