Den tempo antiguo na Grecia, e filosofnan tabata enfatisa e importancia di educacion pa cada persona. Awo den nos tempo moderno nos sa cu un bon educacion ta e yabi pa mas prosperidad, no solamente pa e individuo pero tambe pa comunidad.
Hopi estudio ta mustra cu hende cu educacion mas halto ta haya mas salario, ta mas saludabel y ta mas feliz. Pa un sociedad tambe ta mustra cu tin menos criminalidad y un sistema politico y social cu ta funciona hopi mas miho.
Lamentablemente, educacion a bira un producto di luho caro pa hopi cu kier crece y tin talento pero simplemente no lo por paga e gastonan. Den e articulo di e siman ki nos ta bai papia di un vision briyante over e futuro digital di educacion.
E klaslokaal di 100.000 hende: E poder di educacion digital
Danki na tecnologia, mayoria adulto na Aruba tin internet, un tablet of laptop cu por duna acceso na diferente moda di educacion. En berdad no tin limite di cuanto hende lo por uza un plataforma di educacion.
E hoofdingenieur di Google, Peter Norvig a expresa e pensamento aki den su TED Talk “The 100.000 Classroom”.
E costonan pa “set up” un plataforma di educacion digital ta eenmalig y por duna ful Aruba acceso na ensñansa digital cu un poco costo di server pa run e plataforma.
Den futuro educacion di un nivel sumamente halto por duna na pueblo casi gratis of ful gratis. Asina ta haci e soño di educacion universal pa tur un realidad.
Educacion Digital: Personalisa y Hopi Sofistica
Den un klas di hende tin diferencia entre tur participante. E ta imposibel pa un meneer di scol duna tur hende e atencion cu kier duna. Tin participante ta hopi bon y mester haya materia den un manera mas rapido, tin e grupo gemiddeld cual e sistema ta designa p’e y tin un grupo di participante cu mester mas asistencia y begeleiding.
Cu e poder di inteligencia artificial y un arsena grandi na herment digital den e plataforma tur participante lo haya un meneer digital cu ta available 24/7 y ta duna un trayecto individual y designa pa e studiante ey so.
Por ehempel e plataforma por wak na e manera di traha si un studiante ta bon den Spaans y lo duna les na un manera mas lihe den e topico. Wel, e mesun studiante kisas ta haya Wiskunde mas dificil y e docente digital lo duna extra apoyo den e topico aki.
Tambe danki na tur tipo di herment sofistica cu Dr. Norvig di Google a perfecciona na Stanford University. E grupo experimental tabatin un porcentahe di slaag rond di 90%!
Awo imagina si tur e mentenan briyante di Aruba haya acceso na un plataforma asina, kico lo por ta posibel pa e individuo y pa nos dushi sociedad!
