Scol Paso pa Futuro ta e tema di discusion entre SIMAR y minister di enseñansa Rudy Lampe, kende di su banda kier hustifica su maneho pa loke ta trata su decision pa e retiro di e directora di dicho scol. Dialuna atardi sindicato SIMAR a entrega un carta na Prome Minister Evelyn Wever Croes na Bestuurskantoor y despues a bay na John F. Kennedy Education Center, unda cu sindicato SIMAR, compaña pa dos maestro di Scol Paso pa Futuro, a reuni cu minister Rudy Lampe.
Josephine Albertus, presidente di sindicato SIMAR, a comenta cu e reunion cu e minister no a bay bon.Ta sinti manera cu ta papiando cu un muraya. Loke bisa, no ta penetra, no ta pasa y minister cada biaha ta bin cu un otro motibo.Ora cu wak e motibo cu el a bisa tin algo pa contradici esaki, e ora e ta bin cu un otro motibo. Albertus ta haya cu ta un falta di respet pa wak con e ta tratando e maestronan. Minister tabata sa for di masha tempo cu kier a saca nan for di e edificio.
El a laga nan keda keto bisa nan na juni cu nan ta keda y awo ta bin haci comosifuera cu e cabesante a haci cos fout, cabesante suplente a haci cos fout y cu nan no ta apto pa nan posicion mas.Ora cu puntra minister pakico e ta bisa esey, e ta bisa cu no por pasobra ta algo delicado. Ora cu papia cu e cabesante, ta e unico cos cu el a bisa ta di e muchanan di 6de cu a keda sinta y el a yama Brandweer pa bin scol pa wak un local mirando cu e local no tabata apto pa por duna les.
Diripente e cabesante no ta apto y despues diripente ta tende cu per 1 di october, e cabesante nobo, e gerencia nobo ta bin tuma over. Ta bisa e ora cu e docentenan a habri nan aña escolar cu nan directora y directora suplente pa tende awo cu per 1 di october, nan a haci asina malo cu no ta compronde unda nan a haci malo, con a perhudica e muchanan, con a perhudica e scol.Pero 1 di october nan tin un management nobo na scol.
E punto ta keda cu e minister kier un hende eynan cu ora e bisa bula, bo ta puntra con halto. E minister kier un hende eynan, cu ora e bisa cu ta bay muda, cu nan ta bay muda.Ta haya esaki un falta di respet. E minister ta caba di bisa cu un edificio no ta importante, no mester di un edificio pa duna les. Wel pakico mester sali pa un otro scol tin cu drenta si e edificio di e otro scol no ta importante.Tin diferente motibo cu Albertus ta bisa cu no ta compronde. E ta duna stress sintando eynan.
Atrobe ta keda bisa cu ta un falta di respet. Si e minister tabata sa esaki ora cu aña escolar a habri, mester a bin scol y splica e situacion. Pero no a bisa nan nada. A duna e docentenan un speransa falso.Di parti di minister Lampe, e ta splica cu e pase automatico pa SPO tambe ta un derecho di muchanan special. Ora cu e muchanan caba 6de di Un Paso pa Futuro, automaticamente nan ta bay SPO.Contra palabracion toch a purba di tene e muchanan cu a caba 6de klas, en bes di a manda nan pa bay SPO.Esey ta contra derecho di un mucha special.
El a caba 6de klas, e tin cu sigui enseñansa secundario.Paso pa Futuro no tin programa, no ta yama pa tin un programa pa nan cu a caba 6de klas. P’esey tin enseñansa secundario. Esey ta mustra respet pa e derecho di muchanan special. Rond mundo muchanan special na scolnan special no conoce keda sinta. Tin paisnan cu conoce keda sinta, pero pa scolnan special, no conoce keda sinta.P’esey a bisa cu esey ta respet pa muchanan special cu ta aplica un principio basico na scol special, cu muchanan no ta keda sinta. Eseynan ta e discusionnan cu tin cu no a respeta.
Ora cu Minister papia di respet pa derecho di muchanan special, e kiermen esey. Un cultura di un scol di atencion special pa muchanan special, bo por haci’e unda cu ta. Pasobra loke ta importante ta e cultura di e scol.Un ta e edificio ta haci cu bo tin un cultura respetuoso pa muchanan special. E edificio no ta nada, ta loke tin balor, ta e cultura cu tin den e team, e cultura cu tin di trato di e muchanan special aki, kico bo kier duna nan pa nan por bira un dia indendiente. Pa e minister esey ta importante den e discusion aki.
