Gobierno ta pushando pa habri scolnan, pero nada no ta cla…tin scol ta pidi docentenan pa presenta na scol mañan dialuna cu nan mesun handsanitizer, dunando un indicacion cla cu scol mes no tin ainda. Bañonan no ta adecua y e infrastructura na mayoria scol ta deficiente. “Nos no tin problema pa bay scol, nos mes kier bay scol bek, pero e falta di comunicacion y trahamento bruha aki no ta bon”, asina Josephine Albertus, Presidente di Sindicato di Maestro di Aruba (SIMAR) a bisa awe tardi durante un conferencia di prensa na nan sede.
Cu e realidad aki awor riba mesa, e sindicato ta manda yama su miembronan y tur maestro di Aruba pa un reunion cu caracter di urgencia mañan dialuna pa 5:00pm na Compleho Deportivo Frans Figaroa na Noord. Ey e sindicato lo kier comparti cu su miembronan y tur docente general, di kico ta e retonan cu tin awor riba mesa y kico ta nan pensamento como sindicato. Durante e reunion di mañan e sindicato lo kier tende di su miembronan si acaso nan lo desea pa intensiva e accionnan y e presion cu ta eherciendo awor.
Josephine Albertus, cu riba su mes ta un docente na EPB Hato, a bisa di ta respeta e hecho cu Gobierno ta esun cu ta maneha e pais. Pero, SIMAR ta sinti cu prome cu tuma decisionnan, lo ta bon pa scucha y consulta partnernan den enseñansa, manera ta e sindicato y su miembronan. Actualmente esey no ta e caso, pasobra ta tumando decisionnan abrupto sin cu ta tene ningun sorto di consulta ni ta tene opinion di docentenan na consideracion.
Durante e reunion di mañan, SIMAR lo duna docentenan y miembronan e oportunidad, pa por expresa nan disgusto riba con cosnan ta bayendo. Tambe, por si acaso SIMAR dicidi di hisa e presion, cu e docentenan lo ta bon na altura di e motibo dicon esakinan lo sosode. E sindicalista ta papia di un lista largo cu nan tin di decisionnan cu Gobierno a tuma desde dia 13 di maart caba, sin cu a evalua cada un di e decisionnan aki cu esunnan cu ta traha den e ramo aki.
Pa loke ta e liñanan di contacto entre Gobierno, esta Minister dr. Rudy Lampe y e sindicato SIMAR, ta pidiendo pa mas comunicacion y transparencia. Ta sinti cu mas bien awor Gobierno ta hisa benta y trapa riba derecho di docentenan, sin cu ta tene cuenta debido cu nan mesun salud, nan mesun bienestar y tampoco di e alumnonan.
