Awe mainta a tuma luga apertura di e siman di enseñansa. Segun Aneusca Baly, algemeen directeur di SKOA, durante full e siman tin tayer pa e docentenan. Mainta y atardi di diamars, pa tur docente cu ta traha den e scolnan tin tayer. For di dialuna te cu diahuebs, tin tayer parti merdia pa tur docente. Nan por a inscribi online pa e diferente tayernan.
Tin tayernan cu ta basa riba digitalisacion, tin tayernan cu ta basa riba leadership, workshop pa conoce material, pa docentenan cu ta den kleuter.
Nan tin un variacion pa tur e scolnan, entre otro kleuter, basis y MAVO. Henter e siman aki nan ta enrikeciendo nan mes cu e diferente tayernan pa asina nan crece y trece esaki bek pa e muchanan na scol.
Certificacion
Tabata tin 11 persona cu a certifica. Aña pasa na juni nan a cuminsa cu e curso di ICT Coach, cu a dura un aña intensivo, caminda cu nan mester a haci diferente proyecto y tareanan pa nan ta certifica.
Nan a ricibi nan certificado diamars. E intencion ta pa e personanan aki cu a ricibi nan certificado, bay na diferente scol. E proyecto aki ta un proyecto pa SKOA, pa cinco aña largo, caminda cu hunto cu partner, nan lo certifica 11 diferente persona atrobe, p’asina ey, na cierto momento den cada un di e scolnan, tin un ICT Coach cu lo bay sostene e scol pa loke ta e parti di digitalisacion.
Ainda no ta tur scol ta digital. Haciendo e scolnan digital, no ta un proyecto cu ta di un dia pa otro y ta trece cun’e e reto financiero, Hopi di e scolnan a haci’e cu nan propio fondo. Tin scol cu a haya ayudo. Un di e scolnan, Colegio Frere Bonifacius, ocho aña atras a cuminsa cu iPad. Den cuadro di esey nan a haya ayudo di SETAR, ainda por bisa cu locual ta Frere Bonifacius, e ta un exito. E muchanan, for di klas 4 te cu 6, ta hayando tur nan lesnan riba iPad. Enbes di usa buki, nan ta uza nan iPad caminda tur les ta wordo duna. E ta un proyecto grandi y costoso. E scolnan mes, riba nan propio manera, via di oudercomissie of via diferente actividad of hende den nos comunidad, ta haya sponsor of nan ta haya ayudo pa trece sea chrome books, sea iPad den scol poco poco.
