E prome 9 lunanan di aña pa tabata un exito total pa nos turismo. El a aumenta cu 5.7% y entrada pa camber a conoce un aumento di 8.4%. Pa loke ta trata e prome 3 lunanan di aña, entradanan directamente di turismo a contribui cu 1.094.1 miyon florin na nos economia, es decis mas cu 1 biyon florin! Minister Dangui Oduber a bisa di ta hopi satisfecho cu e resultadonan y indicadornan den turismo pa e prome 9 lunanan di aña 2019. A base continuo Oficina di Turismo di Aruba (A.T.A.) ta registra y analisa e estadisticanan referente nos industria turistico y ta raporta esakinan.
Debi na cambio den e sistema di nos departamento di migracion, esta RADEX (cu ta registra tur bishitante cu ta drenta y sali for di Aruba) cual fin di aña 2018 a wordo modernisa na un programa mas avansa, a experiencia un tardansa inespera pa cu e raportage di e cifranan mensual. Di di parti di A.T.A. ta gradici IASA pa e colaboracion extenso y ta contento di mira adelanto pa asina por ‘get back on track’ den e proximo diananan / lunanan.
Di acuerdo cu e cifranan di IASA (Migracion), Aruba a yama bonbini na un total di 855.734 bishitante ‘stay-over’ durante e prome 9 lunanan di 2019. Esaki ta 5.7% (+46.408 turista) mas compara cu e mesun temporada pa 2018. Aruba Tourism Authority ta anticipa cu aña 2019 lo cera cu un crecemento di 3.6%.
Durante periodo di januari pa september 2019, un total di 555.525 pasahero crucero a bishita nos destinacion riba un total di 207 diferente barco crucero. Compara cu e mesun temporada di aña pasa, turismo crucero a baha cu 2.2% (-12.736 turista crucero). Di e resultadonan di januari pa september ta indica cu aña 2019 lo termina cu alrededor di 815.000 pasahero crucero. Esaki ta aproximadamente e mesun cantidad cu a bishita Aruba durante 2018. Nos mester corda cu 2018 tawata un aña unda e cantidad di pasahero crucero cu a bishita nos destinacion tawata esun mas halto den e historia di industria di crucero na Aruba.
Di acuerdo cu Banco Central, e asina yama ‘Tourism Credits’ (cual anteriomente tawata wordo yama ‘Tourism Receipts’) pa aña 2018 a contribui cu AWG 3.569 miyon den nos economia, cu ta un aumento di 7.5% compara cu 2017. Pa e prome kwartaal di 2019, Tourism Credits a contribui cu AWG 1.094.1 miyon na nos economia cu ta un aumento di 3.1% compara cu e prome kwartaal di 2018. Industria di turismo pa Aruba ta mustra un aumento consistente durante periodo 2011-2018. Pa 2019, ta proyecta cu aña lo cera cu un crecemento entre 4% pa 6% pa loke ta entrada procedente for di turismo.
Segun Aruba Hotel and Tourism Association, di januari 2019 te cu september 2019, e ‘Average Daily Rate’ (ADR) a aumenta cu 6.8% compara cu e mesun temporada na 2018. Esaki den cifra ta US$ 260.67 na 2018 compara cu US$ 278.50 pa 2019. E entrada pa camber disponibel, e asina yama RevPAR a aumenta cu 8.4% di US$ 220.14 (januari te cu september 2018) pa US$ 238.70 pa e prome 9 luna di 2019.
E anochinan ocupa (ORN) pa camber a aumenta cu 2.8% pa e prome 9 luna di 2019. E ocupacion den nos hotelnan tawata 86.6% cual ta esun mas halto den Caribe. Aki ta proyecta cu 2019 lo cera cu un crecemento entre 5% pa 6%. E cifranan di AHATA ta basa riba 17 propiedadnan cual ta mayoria di e hotelnan cu excepcion di Hilton Aruba Caribbean Resort & Casino.
Aruba su turismo exitosamente ta mustra di logra y surpasa proyeccionnan clave stipula pa aña 2019, specialmente riba area di turismo ‘Stay-Over’ (ta proyecta di logra meta stipula), Tourism Credits (ta proyecta di surpasa meta stipula), RevPar (ta proyecta di surpasa meta stipula) y Turismo Crucero (ta proyecta di logra meta stipula). Pa desaroya un producto di calidad pa turistanan ta uno cu ta rekeri vision y maneho strategico.
Gobierno di Aruba como partner di su banda a percura pa establece un maneho cu lo sigui desaroya producto Aruba a base di conecta nos turismo riba areanan manera mehoracion di infrastructura, cultura, innovacion y sostenibilidad. Proyecto nan manera Island Fest, Malmok Boardwalk, Baby Beach , Bushiri Beach y renobacion di piernan na Rodgers Beach ta algun cu ya ta den pleno ehecucion. Ministerio di Turismo lo sigui “target” turistanan di calidad.
Retonan tey y ta birando aun mas fuerte si tira un bista riba 2020, pa cual A.T.A. a stipula proyeccionnan como parti di e plan & presupuesto pa 2020. No solamente competencia lo sigui ta hopi fuerte, pero varios pais lo confronta retonan riba area economico/politico. No obstante e ultimo, Ministerio di Turismo y A.T.A. conhuntamente cu partidonan concerni lo sigui pusha nos pilar economico y a stipula meta pa sigui crece nos entrada pa medio di Turismo. E plan y presupuesto presenta ta acapara strategianan pa combati retonan stipula y tambe sigui posiciona Aruba fuertemente.
Turismo ta fragil y nos mester cuida esaki! Esaki ta un tarea di un y tur! Ban ta consciente di esaki y contribui na un desaroyo sano y duradero di nos turismo!
