Net den e bahia entre Trinidad & Tobago y costa Venezolano (Maturin) tin un tankero para pa casi un luna den un situacion hopi peligroso.
Ta trata di e tanker Nabarima cu abordo tin mas di 1 miyon di bari di petroli. E hecho aki y cu e tankero a kentel ta crea un preocupacion hopi grandi. Si e sink cu e mas di un miyon di crudo abordo, e por drenta lama y causa consecuencia pa Aruba tambe. Den pasado caba tabatin azeta cu a sali for di e pais aki cu a yega te na costa di Aruba.
Rino Hermans, director di Oficina di Prevencion di Calamidad, a splica cu nan tabata na altura di e situacion aki y diasabra ultimo den oranan di mainta a pone riba monitor, cu ta nifica ta bay sigui tur noticia cu tin di haber cu Nabarima y e partnernan envolvi. Principalmente cual ta nan plan pa atende cu e problema aki.
Na unda cu e tanker ta ancra, si e cuminsa leak, lo dura mas o menos tres (3) siman pa e yega Aruba. “Sinembargo nos ta spera cu nan tuma accion den e siguiente 72 oranan pa pomp esaki over. Pero e problema di e tanker ta depende di e situacion geo-politico y e ta nifica cu algun pais mester duna nan aprobacion.” Ya caba Rampenbureau a informa tur instancia local di e situacion.
E deposito petrolero aquatico Nabarima tin 10 aña staciona den Golfo Paria. E ta pertenece na un sociedad forma pa PetroSucre (di PDVSA) y ENI di Italia (participacion minoritario). Nan ta mesun doño di un deposito flotante un poco pariba di Coro, cu tambe a haya problema cu leak. “E ta un factor cu nos tin cu siña biba cu ne y monitor continuamente. Den termino di tres luna, esaki tabata di tres deposito.
Por corda cu na 2016 PetroTri ta 50 mil bari a leak y a afecta e costanan di Aruba, Boneiro y Corsou. Awo ta papia di 1.3 miyon bari di petroli. Tur cos ta depende con lihe e hendenan ta bay traha riba e deposito (hayando e aprobacion door di e medidanan cu tin contra Venezuela), y con e tempo ta. E proximo 72 oranan ta hopi crucial. Hecho ta cu Aruba no tin material pa atende cu e crudo aki (ya cu e no ta un material rafina ainda). P’esey ta trahando riba e situacion y a tuma contacto cu partnernan na Florida caba.
Den pasado Reino Hulandes mester a haci un demanda contra Trinidad. Sinembargo e tempo cu e lo dura y e placa cu lo gasta lo tabata hopi mas di loke por logra, pa cual no a sigui cu e caso.
