“Awe un gran homber lo a cumpli 100 aña, mi Tio Boy Ecury. Manera costumber di tur tempo, ta nos, su famia, ta corda ariba dje y pesey awe cu mi primo German, nos a pone un flor tanto na su graf como na su busto”, asina su sobrino Joseph Dennis Ecury a skirbi awe riba su Facebook.
Ta considera Boy Ecury como nos heroe nacional. Dia6 di November net prome cu Segunda Guera Mundial a caba na 1944, a fusil’e na Waalsdorp, Hulanda, despues a interog’e y tortur’e, despues cu a gar’e, trahando pa resistencia. El a nenga di menciona nomber di su amigonan. El a bira popular pa locual el a bisa prome cu a mat’e: “Den cas di mi tata, no tin luga pa traidor.”
Boy Ecury ta naci dia 23 di april 1922, pues awe lo a cumpli 100 aña si e lo tabata na bida ainda. Awendia nos conoce un monumento dedica na dje y e park, net dilanti e scol cu antes tabata
Albert de Veer, un dokter retira y awendia director di e proyecto cu a haci Boy Ecury Park y cu ta desaroyando e condominium Coral Shell, a cuminsa na 2008 pa haci un renobacion completo di Boy Ecury Park. Pa algun aña e dokter a expresa tres deseo cu ainda no a logra;
1. A pidi Gobernador pa haci e papeleo pa tin guardianan di honor di Marina Real staciona na Aruba, pa tur dia 6 di November, e dia cu a fusila Boy Ecury, pa lanta e bandera di Hulanda y Aruba, pa 7’or di mainta ora trafico ta pasa y pa bah’e 6’or di atardi, cu tur e honor y protocol necesario cu ta duna heroenan di guera, incluyendo e saludo cu riflenan militar.
2. Pa Minister Presidente Evelyn Wever-Croes declara e parke un monumento historico.
3. Pa Parlamento declara dia 6 di November como Freedom Fighters Day di Aruba, pa honra Boy Ecury y tur luchadonan di libertad na mundo henter.
E generacion nobo, hopi biaha no ta realisa, cu nos tin e libertad cu Boy no tabatin pa para fuerte contra inhusticia. El a hacie cu e sacrificio maximo di a perde su bida den e mision eynan.
