Durante e siman di 3 pa 7 di october tabata presente na Aruba un delegacion di Rijksinstituut voor Volksgezondheid en Milieu (RIVM) di Hulanda, pa a brinda e curso di ‘Ship Sanitation Certification’ na e islanan den Caribe Hulandes. E curso aki ta necesario pa como pais bo tin
autoridad cu tin conocemento di tur exigencia stipula conforme “International Health Regulations (IHR)”, na momento cu mester otorga un “Ship Sanitation Certificate” na un barco.
E responabilidad di World Health Organization (WHO) ta pa maneha e control di transmicion di enfermedad internacionalmente, di cual International Health Regulations (IHR) ta un di regulacion di WHO cu tin medida stipula pa evita cu transmicion di malesa por tuma luga.
Na e curso aki a participa Aruba, Boneiro, Corsou, St Maarten y Saba. E curso di “Ship Sanitation Certificate” ta hopi importante pa e inspectornan di seccion di Dienst Warenkeuring en Hygiëne di Directie Volksgezondheid Aruba (DVG). Den pasado tabata otorga “Derating Certificate”, pero desde aña 2005, WHO a revisa e “International Sanitary Regulations” y a adapt’e den “International Health Regulations (IHR)”.
Asina cu Aruba bin riba e lista di WHO como un focal point, e inspectornan di Departamento di Salud (DVG), cu ta encarga pa implementa e medidanan di salud riba barco, conforme e exigencianan stipula den “International Health Regulations (IHR)”, lo por otorga e “Ship Sanitation Certificate”.
Pa medio di Minister di Salud Publico, Dangui Oduber, despues di hopi aña, porfin esaki a bira un realidad. DVG ta contento cu shete empleado di Dienst Warenkeuring en Hygiene a participa na e curso y awo ta certifica.
