Censo tin un lista largo di hendenan cu ta casa, hendenan di afo, of hendenan local cu ta casa cu hende di afo, etc. cu kier registra nan casamento.
Sharin Luydens, directora di Censo a splica cu tin cu separa e matrimonionan cu ta sosode na Aruba y e matrimonionan cu ta sosode afo. Ta dos diferente ley.
Matrimonio cu ta sosode na Aruba pa e codigo civil, articulo 18, lid 2, tin cu wak si ta trata di un matrimonio ficticio of no.
Si ta trata di un Hulandes y un stranhero y tambe pa e ley di Bevolkingsregister, cu e peticionnan di matrimonionan cu ta sosode den exterior, pa e peticionnan por wordo inscribi den e registro civil. Esey tambe segun articulo 22, sub 9, tin cu haci un asina yama schijnhuwelijk toets.
Esey ta tambe entre Hulandes y un stranhero of un hende di firma liber cu un stranhero.
Schijnhuwelijk toets
Tin informacion ta drenta cu toch cada biaha e cantidad di e schijnhuwelijk toets ta crece. Algo asina eynan ta costa Censo hopi trabao. Ta haci mas of menos 16 pa 20 toets pa siman
Cada toets asina ey ta costa un ambtenaar dos ora pa pareha. Bo por cont’e cu ta mas of menos un 32 pa 40 ora di un ambtenaar ta bay riba e peticionnan aki pa siman.
Un peticion asina aki, bo no ta paga absolutamente ningun leges p’e, pasobra e no ta regla pa paga leges pa esaki.
Cuestionario
Cu e toets, tin cu wak si e rasonnan pakico e pareha a casa, ta e rasonnan pakico e instituto di matrimonio a wordo traha.
E instituto di matrimonio pa ley a wordo traha, pa ta fiel na otro, pa yuda otro, pa bo cuida bo yiunan, pa bo forma un famia cu otro, pa bo biba cu otro.
E instituto di matrimonio no a wordo traha absolutamente pa bo por mal usa esaki, abusa di e instituto di matrimonio, pa bo por haya un permiso di estadia.
Esey a ripara cu ta pasa hopi. Por ehempel den e ultimo añanan aki cu e problema di Venezuela, e subida di peticionnan pa matrimonionan wordo inscribi cu a wordo efectua na Venezuela, a subi drasticamente.
Mayoria di e casonan aki ta trata di pareha cu a conoce otro dos pa tres luna. Ningun di nan no tin permiso di estadia.
Bo ta haya tambe personanan cu a caba di wordo deporta, core casa na Venezuela y ta bin y Censo ta sinta cu tur e trabao y ta interoga nan.
Nan ta siña preguntanan cu ta yega un momento cu ta dificil pa bo por nenga esaki. Pero cu Censo ta nenga hopi ta un realidad.
E problema grandi ta, cu e instituto di matrimonio, un instituto asina importante, ta wordo mal usa pa por haya permiso di estadia na Aruba.
Esaki ta un trabao pisa cu Censo ta haci y ta haciendo esaki nan so, segun Luydens.
Luydens a sigui splica cu Censo ta un servicio administrativo. Nan no ta polis. Nan no ta Bijzondere Ambtenaren. Nan ta limita pa bay cas di hende. Nan ta bay, ta puntra rond si den casonan cu mester haci esaki.
Pero nan tambe ta limita den esaki. E ta un trabao hopi pisa. E ta un last hopi grandi pa nan. Mester bin cu un solucion.
Awor aki e instituto ta wordo usa pa haya permisonan pa estadia na Aruba.
Kico ta pasa
Un hende cu por ehempel no tin trabao. Un Hulandes, naci na Aruba, cu no tin trabao, ta casa cu un stranhero, e simpel hecho cu el a casa cu e stranhero, ta duna e derecho pa e haya un permiso di estadia.
E persona ey cu ta haci e peticion pa e persona cu el a casa cun’e bin Aruba, no tin e voorwaarde cu e mester tin un entrada. Esey ta algo cu ta bay pisa riba e convivencia.
