Shalick Clement, vocero di Wardacosta di Caribe Hulandes, den combersacion cu 24ora.com a duna di conoce cu e organisacion cu e ta representa ta encarga cu buskeda y rescate. Nan no ta encarga cu investigacion riba e turista perdi dia prome di september na Aruba, riba lama. Ta trata di e homber Vinay Kundur cu a subi lama riba jetski cu su yiu homber Aditya Kundur.
Clement a splica cu for di momento cu a ricibi e notificacion na e Centro di Alarma, den oranan di merdia, a saca e metal shark y e helicopter. A mantene contacto cu famia, pa haya tur dato di e persona cu tabata perdi.
No solamente tabata importante pa haya sa p.e. con e ta bisti, pero tambe si e tin celular cu ne, y e jetski su specificacionnan. Tur ta yuda den e buskeda. A colecta informacion tambe na Polis. A haya informacion cu a confronta cu problema y cu e yiu mester a landa pa trata di yega tera en busca di ayudo.
A bin topa cu e yiu den area di Manchebo y a suministra informacion na autoridadnan concerni.
Aruba di su banda, el a splica, tambe a saca un helicopter pa yuda den e buskeda. “Ta papia aki di bida di hende y esaki semper ta tuma hopi na serio,” Clement a bisa.
Riba dia di e sucedido mes a sigui cu e buskeda te ora cu solo a baha completamente. E siguiente dia, 2 di september, a cuminsa asina cu solo a sali, haciendo uzo di e metal shark, helicopter y e dash. “Nos berdad ta e autoridad riba lama cu ta haci buskeda y rescate.” E buskedanan aki ta dificil pasobra cada biaha biento of lama ta cambia.
Ta traha a base di un searchbox, y den e area aki,basa riba tur dato acumula, ta haci e buskeda. A busca riba 3 di september tambe. Pero door di e cambio di biento y lama, probablemente lo move e jetski. Segun calculo haci, e biento por hiba e persona riba e aparato direccion di Colombia. A haci tur lo posibel pa haya e persona, incluso informa partnernan internacional.
A saca un texto tambe via di e centro maritimo pa tur boto y tankero pa tene cuenta cu Aruba ta buscando un persona perdi riba lama. Esaki a bay tur e navenan cu ta den e area cerca di Aruba.
Si tin un investigacion penal, esaki Kustwacht no tin nada di haber. Ta traha hunto cu Cuerpo Policial di Aruba, pero mas den e parti di buskeda y rescate.
Mirando e tempo cu a pasa, e probabilidad pa haya e persona aki ta minimo. Autoridadnan di Colombia a indica cu nan tambe a haci un buskeda pero no a topa cu algo. Kustwacht si ta den contacto cu e famia pa informa nan kico a haci, y cu investigacion ta den man di KPA.
