Cada biaha cu tin un cambio di gerencia na Parke Arikok, trahadonan ta haya nan mes den un incertidumbre. Magali Brito, secretario general di SEPPA, a splica cu despues di e resultado di e referendum, trahadonan di Parke Arikok a sinta cu nan. Nan a eligi nan shopstewardnan, esnan cu ta representa nan den nan asuntonan di trabao.
SEPPA a reuni despues di esey cu un parti di e delegacion di e directiva y despues di esey, SEPPA mes a keda reuni internamente riba diferente asunto. Ultimo a manda bisa e directiva cu ya SEPPA ta cla y ta asina leu cu nan ta pidi pa bay sinta na mesa y atende diferente asunto cu a keda pendiente.
Sa cu pa loke ta trata e proceso di obhecion cu e trahadonan ta aden, mientras tanto diferente trahado a haya adelanto, nan a haya reconocimento den nan trabao. Esey tabata importante pa nan.
Tin mas cos cu lo mester keda atendi. E contracto colectivo mester bay wordo negosha y pa bin un claridad, di un bes, kico ta conta pa e trahadonan di Parke Arikok.
Tin cu bisa si, cu den e ultimo 13 añanan, ta diferente asunto a wordo regla y nan ta stipula como tal. Pero no mester lubida cu parke tambe ta un fundacion.
E tambe ta den e risico of intentonan cada biaha pa simplemente duna parke un suma di placa, cu e consecuencia cu nan ta purba e ora pa minimalisa mas tanto posibel, cualkier derecho di trahado di e fundacion aki.
Esaki ta locual cu e trahadonan ta hopi alerta riba dje, segun Brito. Mester tene cuenta tambe cu tin un grupo di e trahadonan aki cu den pasado, en principio tabata traha pa gobierno y despues nan a bay over den e fundacionnan, di cual cu ta bisa cu tur nan derecho ta keda conta igual como empleadonan publico.
Eynan mester ta hopi cauteloso pa e negociacion aki cu loke bay bin cun’e, pa regla tur esakinan corectamente.
Di mes momento a mira cu awor aki ta papia di e parke marino cu tambe ta cay bao di Parke Arikok. E trahadonan aki tambe ta sinti cu loke nan conoce caba, ta pone cu e hendenan aki ta traha den un parke, aunke parke marino ta forma parti di dje, pero ta un area cu no ta custumbra realmente cun’e y cu e cantidad di personal lo no bay make it tampoco.
Esakinan ta situacion cu lo mester tin mas claridad riba dje. Mester por regla tambe e funcion di esnan cu ta cay bao di parke marino, lo bay ta tambe y con e palabracionnan lo ta hinca den otro.
Ta temanan cu manera aña a habri a wordo plantea door di e propio trahadonan y esakinan ta loke cu tambe lo bay wordo discuti den 2019.
Brito a splica cu e intencion ta pa pusha Parke Arikok hunto cu Parke marino. E parke marino ta forma parti awor aki bao di e maneho di Parke Arikok. E ora eynan loke a pusha nan tambe den e direccion ey, mientras cu kisas lo ta mas na su luga pa pone e cantidad di personal extra, pa prepara nan tambe pa por handle e parke marino enbes di schommel tur hende den otro aki.
Por ta e ta cosnan cu ta facil pa atende na mesa, enbes di djis lag’e den laira. Pa e trahadonan no ta mucho cla ainda con e funcionamento lo ta.
Topa cu gerencia
Tin dos cos. Uno ta esnan cu ta maneha e parke, cual ta gerencia. Den pasado tambe e ta asina cu a haya hopi problema for di momento cu cada biaha ta cambia di director. Esey ta trece tardansa cu e asuntonan di e trahadonan no ta wordo atendi.
Despues por corda cu e directiva saliente tabata bisa cu pa no perhudica e trahadonan, tur asunto di personal ta wordo atendi cu nan directamente. Esey ta loke cu SEPPA a bin ta haciendo tambe, pa motibo cu esnan cu tabata den gerencia no tabata tin hopi tempo trahando y a lage asina.
Awor aki cu e directiva actual, a compronde cu nan ta sigui cu esey, esta cu nan tin personanan encarga den e directiva. Nan ta atende e asuntonan di personal y cu e persona aki ta bezig na mesa realmente pa keda cla cu tur locual cu tin entre otro pendiente di e trahadonan aki, pero tambe locual con ta bay regla cosnan for di awo p’adilanti.
