Segun Magaly Brito, SEPPA tin diferente informacion encuanto intencion di baha edad di pensioen, pero concreto no a hay’e for di e gobernantenan encarga cu esaki. Ta en espera di dje naturalmente. Semper tipo di discusionnan asina ta tuma luga na mesa, hunto cu sindicato y dunadonan di trabao. Ta en espera di un posicion concreto, un discusion habri y sincero riba dje. Tur locual cu tin na e momentonan aki ta e preocupacion cu tin pa trahadonan cu tin un porcentahe di 5% cu ta den laira cu ta wordo menciona si esaki ta corecto si of no. Esey ta e preocupacion cu ta reinando awor aki cerca e trahadonan. Principalmente cerca e trahadonan hoben cu ta keda traha. Cerca nan e pregunta ta, kende lo tin cu bay carga e consecuencia aki di un eventual prima extra cu lo mester por bin den e fondo di pensioen di biehes di AOV, pero tambe con ta bay para cu e fondo di pensioen di empleadonan publico, ora cu bo baha edad di pensioen, lo tin consecuencia riba e fondo. No ta papiando di miles, ta papiando di miyones. Con e fondo ta para frente esaki, ki decisionnan lo bay wordo tuma. E ora eynan, ki consecuencia lo tin como empleadonan publico.
Si Gobierno yega na e tumamento di decision, naturalmente SEPPA ta spera cu lo ta habri pa un discusion. Den pasado semper tabata asina. Locual cu na e momentonan aki, como cu e preocupacion ta yega basta cerca na SEPPA y e delegadonan. En todo caso , SEPPA ta invitando tanto instancia di SVB como di APFA pa duna presentacion con nos ta para na e momentonan aki, principalmente e fondo di pensioen di APFA. Pa motibo cu nan tabata den un periodo di recuperacion, kier sa con leu e ta. Recientemente a haya un presentacion di e fondo di APFA y ta contento cu e stapnan cu el a dal. Naturalmente kier pa e informacion aki ta cerca tur delegado, pero tambe kier intercambia di idea cu nan cu dado momento cu si tin bahamento di edad di pensioen, cu nan mes ta mir’e, ki efecto e por tin pa mañan, ora tuma un decision, lo tuma un decision uno mas coherente, mas miho pa e empleadonan publico.
Pa e parti di e fondo di pensioen di AOV, sa cu e tambe ta un periodo di recuperacion den e sentido cu den e ultimo cambionan cu a tuma luga, hasta pa e aumento di edad di pensioen, tabata basa pa yuda SVB genera entrada, pero na mes momento pa frena e gastonan cu tin na e momentonan aki. Awor aki si tin un cambio den e decision aki, ki consecuencia e lo por tin pa e fondo y na e mes momento tambe ki consecuencia e lo por tin pa e acuerdo cu tabata tin den pasado, cu cierto momento ora cu e fondo di AOV ta yega toch stabil, e ora eynan cu e decision mester bin bek, con pa baha e prima, embes di con ta bay subi’e, si mester bin un cambio na e momentonan aki.
