Edmundo Marlin, vice presidente di sindicato SEPPA, a reacciona riba un ponencia treci dilanti door di sindicato STA y su presidente Diego de Cuba, cu e ta bisa cu no ta cuadra cu realidad.
SEPPA como e sindicato cu mas tanto cantidad di miembro na SERLIMAR tin un asiento den e Hunta di Supervision. Pero e persona nombra of apunta door di SEPPA, ta keda personalmente responsabel. Tur decision cu e tuma ta riba su mes y no tin ningun deber di consulta cu SEPPA, cu ta esun cu a pone eynan. “Mi kier pa esaki ta bon cla pa tur hende,” Marlin a bisa.
A dicidi pa bini dilanti cu e informacion aki pa bisa cu nan no ta responsabel pa cualkier cos cu a sosode eyden. Cada persona nombra den cualkier Raad van Toezicht ta keda personalmente responsabel pa tur decision cu nan tuma. “SEPPA no ta forma parti di loke cu a pasa na SERLIMAR pa loke ta su maneho.”
Pa loke ta e situacion cu a surgi na SERLIMAR, el a bisa cu loke a pasa tabata simplemente algo cu a sosode pa falta di comunicacion. Unabes cu su miembronan a inform’e cu dia 23 ainda no a haya nada, mesora a informa e director por escrito pa e empleadonan ricibi nan salario y vakantie-uitkering.
Tambe Marlin a papia di e procedura cu nan a sigui pa sigura cu e empleadonan ta haya nan pagonan necesario y loke cu nan a papia cu e Minister encarga.
