Siman pasa dialuna e trahadonan di Arubus a pone trabou abou pa cuater ora, pero como cu nan no ta di acuerdo cu gerencia, nan a bolbe haci esey diahuebs y e biaha aki pa 24 ora. A duna gerencia di Arubus deadline pa un contesta di proposicion, pero ora a haya esaki nan no a acepta.
Sindicato SEPPA a dirigi un carta dialuna mainta na Minister di Transporte, Ursell Arends. Den e carta aki a pone e contra proposicion dje trahadonan Arubus. SEPPA a informa e mandatario cu segun e acuerdo di e resultado dje reunion di diadomingo sosteni cu e trahadonan. E trahadonan no ta acepta e fl.750 extra como compensacion pa cambia e fecha acorda den e protocol 2019 pa implementacion di e structura salarial.
Tanto SEPPA como e trahadonan ta pidi pa para e implementacion di e structura salarial y pa bay den discusion pa por yega na acuerdo riba un structura cu ta satisfactorio pa tur hende. Den e carta a informa pa tene e reunion aki no mas tarda cu prome di maart 2023.
Nan ta dispuesto pa yega na acuerdo, pero tambe ta pidi un aumento general di salario di fl.150 pa tur trahado cu ta cay bao di e CAO. Pa loke ta e tema di extension di e CAO, SEPPA a informa cu e trahadonan por bay di acuerdo cu esaki. Pero netamente teniendo cuenta cu e situacion di Arubus y pa duna gobierno mas tempo, ta propone pa esaki wordo alarga pa dos aña. A cambio SEPPA ta pidi un compensacion di 1850 florin netto cual mester wordo paga dia 15 di februari na 2023 y na 2024.
Loading…
Reload document 
Open in new tab Cu esaki e trahadonan ta kere cu e ta un proposicion husto y cu ta duna Arubus oportunidad pa busca e solucionnan necesario pa e problemanan di Arubus. Tambe ta drecha e situacion di e compania.
Tambe SEPPA a mustra e minister cu pa hopi tempo gobierno a tapa su wowonan. Gobierno no a busca un solucion ni a actua na tempo y no por tira esaki awo ni haci e trahadonan victima di dje.
SEPPA a pidi Minister Arends pa duna un contesta no mas tarda dia 23 di december proximo.
