No ta un ni dos, sino ta decenas di e stepnan aki lo bo topa benta tur caminda den cercania di hotelnan of den areanan turistico di nos pais. Turista ta subi un di e stepnan aki dilanti nan hotel y ta core bin te Playa riba nan. E vehiculo no ta paga impuesto pa uza caminda y ta forma parti ilegal den nos trafico. E instancianan concerni ta keto bay man crusa, te dia algo bay robes!
Tabata na februari 2020, net prome cu pandemia, cu e compania E-Vikes a lansa e servicio nobo aki na Aruba. El a yama nan “Electric Scooters” y a bisa cu nan ta den mas di 100 pais caba. E compania a adkiri 100 di e vehiculonan aki y bo ta haya nan benta tur rond di nos isla.
Pa awor, mas cu servicio, el a bira un molester. Hotelnan y tur negoshi den e area turistico ta lanta mainta cu e stepnan aki benta tur caminda. Tin pasahero ta drenta te den lobby di hotel cu nan, pa cual siguridad tin man yen cu e asunto aki.
Ta cobra pa huur
Pa por huur un di e vehiculonan asina, mester download un app den bo celular. Bo mester tin un telefon, conexion di wifi y bluetooth. Cu e celular ta download e aplicacion, pasa scan e bar-code di e aparato y djey pa $1.05 por huur e e-scooter. Pa cada minuut cu nan core, ta cobra $0.50. E mashinnan ta traha entre 8:00 am pa 11:00 pm.
Restriccion
E-vikes ta traha riba un sistema di GPS y tambe Userblock. No ta permiti pa subi caminda grandi cu nan. Si un hende purba toch, e aparato lo blokia y lo dal paga. Por core ful e fietspad di Linear Park. Asina cu pasa 5 meter for di e Linear Park, e lo dal paga. E ta duna un aviso cu ta yegando e limite y e aparato lo paga.
Por uz’e pa dos ora
E tempo di bateria 100%, ta di un uzo continuo di dos ora. Door cu e ta trata aki di un micro mobility vehicle, e aparato ta djis pa move di un luga pa otro, specialmente pa hendenan di edad. Despues di e tempo ey, mester pone “charge” pa por sigui uz’e.
Confusion unda por core cu ne
E compania local a sigura cu nan tin e permisonan y e seguro apropia. Dos aña pasa ora nan a cuminsa, a acerca Strandpolitie y a haci un introduccion di e producto, e uzo y e camindanan cu tin pensa di pone. Desde dos aña pasa, e compania tabata bezig cu regulacion hunto cu DOW pa anallisa si por expande e area un tiki mas. A acorda cu e vehiculonan ta pa core riba acera. E no ta bira un transporte cu bo ta bay core riba caminda den areanan publico, sino mas bien riba acera. Caminda cu tin boardwalk. Y parce cu ta aki mes a bin confusion, pasobra riba e step tin poni cu no por core riba voetpad cu ne, pues ta obliga e usuario pa subi caminda y core memey di e autonan. Tur esaki siendo cu e vehiculonan no tin un nummerplaat ni ta paga impuesto di caminda.
Step electrico na Hulanda
Na Hulanda, un step electrico tambe ta denomina como e-step of electric scooter step. Actualmente, solamente un cantidad hopi limita di step electrico ta regula pa gobierno como ‘bijzondere bromfiets’ y como tal por circula riba caminda publico. Tur step electrico cu no ta gekeurd como ‘bijzondere bromfiest’ ta prohibi pa circula riba caminda publico. Si haci esaki, bo por haya un multa y por confisca e e-step. Ta haciendo tramite via un ley nobo p’e LEV (Vehiculo Electronico Liviano of Lichte Elektronische Voertuigen), entre cual ta inclui e step electronico. Ta premira cu e ley nobo aki lo drenta na vigor na Hulanda entrante dia prome di januari 2023.
Con ta keur nan na Hulanda
Un step electronico gekeurd como un ‘bijzondere bromfiets” mester tin un stuur of man, no por surpasa 25 km/h, por yega na un potencia maximo di 4kW, mester tin un plach’i seguro y mester ta ekipa cu reflectors. Edad minimo pa maneha esaki ta di 16 aña y no ta necesario pa pasa un rijbewijs. Helm no ta obligatorio pero si ta recomendabel.
Reglanan di trafico
Mester respeta regla di trafico y tur señal cu ta conta p’e ciclistanan. Mester circula riba e fiestpad si tin, den caso contrario na banda di caminda. Na Hulanda ta prohibi pa nan circula riba acera. Velocidad maximo ta di 25 km/h. Den scuridad y ora cu visibilidad ta scars, ta obligatorio tin e luznan cendi dilanti y patras (tambe por uza luz pega na paña of na helm). Ta prohibi pa tin e celular den man.
