Recientemente e seleccion di baseball di Aruba den e categoria U12 a biaha pa un torneo grandi di baseball cu lo tuma lugar na Nicaragua.
E Panamericano di baseball ta e evento mas grandi di baseball den e continente America y lo conta cu participacion di tur e paisnan miembro manera Merca, Mexico, Canada, Venezuela, Colombia, Cuba, Republica Dominicana, Puerto Rico, Corsow, Us Virgin Island, Nicaragua, El Salvador, Guatemala, Bahamas y Aruba. Despues di varios aña ausente na un torneo Panamericano di baseball, Aruba ta haya un oportunidad unico pa nos baseball briya entre e grandinan den nos region y continente. Ta bon pa menciona cu nos hoben peloteronan a hiba un bon preparacion pa e Panamericano di baseball aki unda nan a entrena varios siman bou guia di nan coachnan. Nos muchanan ta cla pa duna bataya contra di e paisnan participante na e torneo aki.
E hungadornan cu lo representa Aruba den e Panamericano ta Keyon Ashby, Yoswill Avila, Cristian Varela, Luison Da Silva, Dwayne Dabian, Jermaine Farro, Daniel de la Cruz, Juameth Ignacio, Ian Kock, Ashton Kock, Tai Vic Tromp, Revan Maduro, Carlwin Maduro, Jomar Ortiz, Zarik Tromp, Xavier Werleman, Vinshley Winterdal y Shawn Webb. Notable ta cu e hoben Webb durante di un entrenamento a scheur su man y no lo por biaha cu e seleccion. Un danki sigur na Lotto, e Loteria di Aruba pa medio di Comision di Subsidio ta yuda subisdia e biahe di e seleccion U12 di baseball di Aruba pa e Panamericano di baseball na Nicaragua. Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.
