Aruba Reef Care Foundation, ta ofrece bo un oportunidad pa ta parti e impacto positivo cu cada ciudadano por tin riba su medio ambiente. Si ta un aruba sostenible y limpi bo ke, e di 25 accion anual di concientisacion y limpiesa ta unda bo tin chens pa yuda haci un diferencia positivo.
Registra, participa y contribui na e proyecto cual su obhetivo principal ta pa concientisa publico tocante e importancia pa cuida y proteha nos lama y beachnan. E grupo di voluntarionan ta cla pa otro grandioso accion di limpiesa cu ta culmina 2019. Un biaha mas un y tur ta invita pa yuda mantene nos beach y den lama limpi y bunita. Manera ya ta custumber, durante henter aña e comision di aruba reef care ta ofrece un serie di presentacion na scolnan di aruba.
Durante e presentacionnan di aruba reef care tanto na scol como empresanan, ta invita esakinan pa adopta un pida beach of area cu den futuro nan por mantene limpi periodicamente y di e forma aki contribui activamente como ehempel na comunidad pa cuido di nos medio ambiente. Claro, ta encurasha otro organisacion of hasta empresanan, pa pidi pa un presentacion special y asina pro-activamente yuda na concientisa y tene aruba limpi. Desde juni 1994 aruba reef care project, iniciativa di sr. Castro perez ta yuda concientisa aruba di e necesidad di cuida lama y beachnan. E idea a wordo ricibi cu tur apoyo necesario for di oficina di turismo (aruba tourism authority), santa rosa (lvv) y tambe otro instancianan. Durante di e añanan e proyecto a sa di uni varios operador di buceo, compania di deporte acuatico y instancianan particular y publico pa contribui na yuda proteha costanan como tambe sitionan bou di lama, no solamente cu haci limpiesa pero tambe cu combati lionfish y mas. Aruba reef care project ta ser patrocina pa aruba tourism authority, como esun principal, e aña aki tambe a join nos atrobe cu ta aruba airport authority, aruba port authority conhuntamente cu e patrocinadornan anual manera mourik aruba n.v., rbc royal bank, dlvv santa rosa, total services n.v., total finance n.v. Visser pharma n.v., serlimar, bix brandsimport n.v. Centro di pesca hadicurari, y garage centraal n.v. Y aruba wine & dine n.v., como tambe varios otro contribuidor di diferente forma. 
Progreso di aruba reef care project:
aunke cu e organisadornan ta comproba cu cada biaha tin menos sushi bou di lama, principalmente ariba e rifnan di coral y tambe na e sitionan di sambuya, ainda tin sushi ta drenta lama. Ainda falta hopi trabou pa haci riba e tereno di proteccion y conservacion di costa, beach, rif y otro flora y fauna di nos isla. Den transcurso di añanan, por bisa cu e cantidad di participante a aumenta (casi 900), mientras cu por bisa cu orguyo cu e cantidad di sushi colecta si ta bahando. Un indicacion di e exito di e esfuerso comunitario aki. 
por menciona cu esnan envolvi tambe ta raportando cu nan tambe ta mira e progreso di concientisacion y accion continuo. Tin sitionan popular di buceo, unda door di esfuerso conhunto e cantidad di desperdicio visibel awendia ta mucho menos cu loke e tabata na comienso. Di otro banda tin preocupacionnan ainda pa e echo cu sushedad for di fuentenan for di tera, sea accidentalmente of a proposito, ta keda yega lama cu e biento fuerte di nos isla. Sitionan unda hopi hende ta bay beach pa recreo, hopi biaha ta haya desperdicio regularmente ainda. Esakinan mester bira enfoke di futuro concientisacion y cual e organisacion lo aporta a largo plaso.
E centro di operación ta neptali henriquez park:
Dia 29 di september proximo neptali henriquez park ta atrobe e centro di operación. For di aki lo coordina e accion y tambe lo ta e punto central pa acumula e datonan. Mas cu claro e acto ceremonial di clausura y gradicimento na boluntarionan tambe lo tuma lugar na e sitio mes, e diadomingo atardi di 29 di september. E sitionan cu lo bay cubri ta entre otro tras di faro california, arashi, boca catalina, malmok, hadicurari, e beachnan dilanti di e hotelnan na palm beach, eagle beach, surf side, mangel halto, baby beach, santana di cacho, grape field, boca grandi, area rond di neptali henriquez park pa cas di gobernador y tambe den e area di bushiri beach resort.
Ta apela na henter comunidad pa conhuntamente manifesta nos compromiso cu medio ambiente pa yuda mantene nos beach y lama limpi. Varios operador di watersport a compromete nan mes pa yuda cu e operacion den awa. Organisadornan ta invita tur grupo ambiental, club social, scout, scol y tambe boluntarionan pa contribui na e campaña. Esnan cu kier participa por tuma contacto cu nan operador di deporte acuatico faborito of tuma contacto cu arcp na 586-0820/ 564-4485 of 740-0797/ y puntra pa castro perez of veronica perez. Tur participante, ademas di e satisfaccion di haci aruba limpi, ta ricibi un t-shirt pa un donación di awg. 5.00, sandwich, awa, soft drinks y durante e celebracion final diadomingo 30 di september na neptali henriquez park lo ricibi un certificado di aprecio y por participa na rifa pa diferente premionan atractivo. Nos ta conta ariba e apoyo di henter e comunidad di aruba pa yuda proteha nos recursonan natural. 
