Ta prome biaha cu Aruba Tourist Authority (ATA) a uni forsa cu Aruba Airport Authority (Triple A) y pa participa den e evento turistico Routes Americas 2024. Sanju Luidens, Chief Marketing Officer Aruba Tourism Authority, ta mira esaki “como un bon oportunidad ya cu nos ta traha tur dia cu Triple A riba strategia pa cu aerolineanan”.
Ta masha importante pa e strategia di Triple A pa ta alinea cu e mercadonan cu ATA ta busca pa saca mas bentaha (negoshi) for di nan. Ta papia principalmente di turistanan cu entrada halto cu di e forma aki ta contribui mas na e economia di Aruba.
Aunke ta prome biaha a uni pa cu e evento aki, ATA tin un relacion estrecho cu Triple A pa hopi aña caba riba e parti di mercadeo (aerolineanan).
Pa ATA tabata importante participa den e conferencia internacional, na Bogota, pa mira cual ta e oportunidadnan nobo cu aerolineanan, pero tambe e tendencianan cu tin riba e tereno di aviacion internacionalmente. Ta importante pa ta na altura di e plannan di cada compania di aviacion y mira con ta alinea cu e plannan di Aruba pa futuro. “Nos ta bay bek den nos seno, y planifica pa futuro.”
Luidens ta mira den entre otro JetBlue un partner cu ta traha cu e concepto cu Aruba tin semper den mente: Premium Leisure Traveller. “Esey ta basicamente e tipo di cliente cu nos kier pa Aruba, e cliente di entrada halto. E ta mustra cu nos ta hopi alinea cu otro. Nos ta traha hunto cu nan pa logra e strategia ey.”
Sanju Luidens a splica cu nan sa tin contacto regular cu aerolineanan, pero locual el a haya hopi interesante ta cu a constata cu Aruba como destinacion ta hopi fuerte. E ta atractivo pa e aerolineanan cu no ta mira e cantidad di hendenan cu ta yega e isla, sino e calidad y loke e ta nifica pa nan como aerolinea.
P’esey nan tabata hopi interesa den tur e aspectonan nobo di e producto Aruba. E unico problema a constata ta cerca e aerolineanan cu no tin suficiente ekipo pa cumpli cu loke nan kier logra.
