Diadomingo awo, dia 17 di november, San Nicolas lo bay tin su prome Sunrise Bingo, evento introduci pa Frank Solognier, director general di Five Crown Gaming NV. E actividad aki ta bay ta den Joe Laveist Sport Park y cu mas di 6 mil florin na premio.
Prijs pa carchi lo ta 15 florin pa cuater carchi y benta lo cuminsa pa 4’or di atardi. Ta bay tin diferente doorprize y tambe entretenimento. Ta bay tin 10 wega y 4 chens pa cada wega.
E Bingo ta programa pa cuminsa pa 6’or y mey en punto y ta calcula pa 8’or y 45, e Bingo lo caba. Edad pa drenta ta 15 aña, pero mester ta compaña pa un mayor, pasobra si e gana e no por cobra e placa. Bou di 15 aña no ta permiti pa drenta.Junior Tromp a splica c una e evento aki lo bay tin waiters pa atende cu e clientenan y duna nan un bunita servicio. E ta un forma pa yuda ciudadanonan tambe ya cu na cada wega lo haci uzo di 22 trahado.
Un centro multifuncionalE parti caminda cu e bingo lo tuma luga, ta un centro multifuncional. No solamente por practica deporte, pero por tene actividad manera fiesta, reunion, y den e caso aki, e bingo.
Frank Solognier a indica cu nan kier bin cu varios proyecto na e parti p’ariba di nos isla y ya caba tin contacto cu varios di e organisacionnan na San Nicolas cu ta eherce un of mas tarea comunitario, entre otro Unity in the Community Foundation di Angelo Richardson, kende sigur ta duna su sosten na e proyecto aki, cual Solognier a menciona, e intencion ta di haci’e mas biaha.Tin scol uzando e facilidad aki pa algún luna caba, pero awo ta momento pa habri’e pa publico tambe por probecha di di actividadnan den e evento aki.
E Bingo ta algo cu lo bira un evento hopi social. Un encuesta haci ta mustra cu tin hopi hende pariba ta hunga Bingo, pero door cu edad a subi, ta bira difícil pa nan yega pabou. P’esey a dicidi di pone e bingo aki pariba pa e hendenan aki por entretene nan mes. Nan a gradici Tropical Bottling pa e coopera y Chef Darwin. Ta bay tin productonan di artesanía cu e bishitantenan por cumpra.
