E problema di rioolwaterzuiveringsinstallatie (RWZI) cu lo yena mita Aruba cu awa sushi si no yega na un solucion pronto, tin atencion di politica. “Si no tin un maneho total aki na Arua, lo crea peligro pa salud di hende y gasto pa e ciudadano. Y nos a mir’e den e maneho unda Ursell a dal porta di dump cera.” Esaki ta loke parlamentario independiente Ryçond Santos do Nascimento ta bisa den un declaracion for di e planta na Zeewijk.
Aruba ta pasando den un problema serio cu e diferente instalacionnan di RWZI. Di e tres plantanan cu tin awo ta esun di Zeewijk so ta funciona debidamente. Den siman tras di lomba, despues cu a crea mini dump, tin e impresion cu debi na e situacion cu e RWZI-nan, a cuminsa basha awa sushi den damnan. Ambos problema tin di haber cu e ministerio cu ta cay bou di minister Ursell Arends.
Por spera un problema serio den e dianan aki. Aruba ta den un fin di siman largo, unda cu operacion ta cuminsa normal bek diamars. Mientrastanto e planta di Zeewijk cu ta acepta e trucknan di chica pos a cera su portanan tambe y ta habri te diamars mainta. Pues ta pasa practicamente dos dia sin tin luga unda cu por bay deposita e awa sushi caba.
Ta conoci cu ta manera den forma di cadena e trucknan ta yega na e plantanan di purificacion di awa pa deshaci di nan carga. Na esun na Parkietenbos tin slot pa atende cinco truck pareu. Debi na problema cu esun na Bubali a cuminsa uza esun di Parkietenbos mas hopi pero tambe tin otro problema. E sludge cu e proceso ta crea, no tin caminda pa kim’e. Esaki pasobra ta manera un cadena di problema cu lo explota den dianan aki. E incinerator no tin permiso di molester. Minister Ursell Arends (Naturalesa) a tira e presion cu tur esaki ta causa riba lomba di hues, cu a bisa cu e no por opera sin e permiso. En bes di bisa cu ta gobierno no a percura cu tin e permiso prome cu e incinerator a cuminsa funciona.
E falta di maneho aki ta loke cu e parlamentario independiente Do Nascimento ta papia riba dje.
Desde 2021 a bin ta señala e problema aki y loke ta aparece den e rapport CARMABI y PAHO. “Ta masha cos nos a señala riba e area di maneho, of falta di maneho di desperdicio na e pais aki.”.
E falta di maneho tin dos problema grandi, den bista di e politico independiente aki. Si no tin un maneho total, e ta crea peligro pa salud di hende, manera a sosode na e bisindario di Parkietenbos, y crea gasto pa e ciudadanonan. A mira esaki den e forma cu a dal e porta di dump cera, creando gasto pa ciudadanonan. Y hasta a sosode cu e parkeermeter ora cu sin planificacion serio a reintroduci e parkeermeter.
E ta masha contento cu instancia y politiconan ta papiando di “maneho” di desperdicio. Pa esaki, e ta bisa, mester tin un ley di medio ambiente, cu ta acapara henter e proceso, tanto e sushi likido como esun solido. E tin un miedo si, pasobra a keda demostra rond mundo cu maneho di desperdicio ta un paraiso pa corupcion tuma luga. “Tin hopi contractnan miyonario rond di maneho di desperdicio. Tanto berde como geel a neglisha, desde 1986 e maneho di desperdicio. Y ora cu haci algo cu maneho ey, a distribui miyones of cu a bay den cartera di cierto interesnan particular. Esey ta maneho di desperdicio na e pais aki. Ta tempo pa nos cambia e manera cu nos a maneha esaki …. di e punta aya te e punta aki (Zeewijk) ta fiesta di pupu tin na e pais aki y esey mester caba. Mester tin un maneho total. Ora cu nos ta hacie, e peligro ta e corupcion.”
Tambe el a reacciona riba declaracion di Otmar Oduber, y a bisa cu no mester lubida cu Oduber ta un sospechoso cu ta atacando henter e cadena hudicial. Esey ta hacie un peligro pa integridad. Hsta un banco no ta confie cu un cuenta di banco, “di con abo como ciudadano mester confie cu bo voto. Ta importante pa nos compronde cu den e cuestion aki ta hopi placa tin envolvi y mester di un maneho serio.”
