E parlamentarionan di parlamento di Aruba, Corsou y St. Maarten y e miembronan di Eerste y Tweede Kamer a trata e topico di cambio climatico durante Interparlamentair Koninkrijksoverleg (IPKO) na Hulanda.
Hopi biaha ta tende di rapport devastador di instancia. Tambe ta scucha di Carmabi y Directie Natuur en Milieu (DNM) tin diferente preocupacion. Ryçond Santos do Nascimento, parlamentario independiente, a indica cu hopi bes no ta compronde riba e importancia di e topico di clima. Hopi biaha ta mira riba e parti grandi, e parti cu “nos mes” no tin hopi influencia. Si tur hende ta bay tin auto electronico, “nos no ta bay cambia emision di gas pa mundo.” E no ta bay tin ningun impacto.
Esey no ta kita cu e manera con mundo ta bayendo tin peliger grandi cu dentro di algun aña Aruba, Corsou, St. Maarten ta perde parti di nan teritorio. Esaki ta bini pa motibo cu awa ta subi. Locual ta lubida hopi biaha ta pa pone e link entre medio ambiente y salud di hende.
Santos do Nascimento a combersa cu varios parlamentario Hulandes riba e topico ey. Extensamente nan a papia riba e topico ey y hende mester compronde cu ora tin un Parkietenbos, tin un Rioolwaterzuiveringsinstallatie (RWZI) na Bubali, no ta papia solamente di impacto di medio ambiente. Pero ta papia di e impacto riba bida y salud di hende.
Si e Parkietenbos ta causa polucion, e ta afecta e hendenan den e bario, ta afecta e hendenan cu ta traha den vecindario of hasta riba e planta. Esey ta bay afecta nan famia.
Si tin un RWZI cu no ta funciona, cu ta pomp e awa den Bubali, y ora esey ta yen, ta habri e sluis y manda e awa di sushedad den lama. E ora no ta afecta solamente e turismo di Aruba, cu ta e parti economico, cu ta un parti abstracto cu hende no ta compronde. Pero e ta afecta hende cu ta landa den e awa ey.
E topiconan di clima y medio ambiente ta algo importante pa cada persona, p’esey gobierno mester pone mas atencion riba e cosnan aki. Pero ta lamenta cu tin un minister Ursell Arends cu ta pone hopi enfasis pa cambia cos den constitucion y tin un maneho cu realmente no ta mas cu lapi lapi. Pero investiga e pida aki di e situacion, e impacto di ser humano, esey ainda ta laga di desea.
Pa mas lesa TREMPAN.COM.
