E tabata pa hopi aña miembro di e Hunta di Comisarionan di nos compania nacional di telecomunicacion, SETAR. Pero, na momento cu a bin eleccion y coalicion a cambia, SETAR a bira parti di e cartera di Partido Raiz. Minister Geoffrey Wever a cambia e directiva politico pa un profesional y asina Oduber a keda afo. Pero no pa largo, pasobra Minister Glenbert Croes di MEP a acerc’e y pidie pa asumi un puesto habri den e hunta di comisario di WEB Aruba N.V. entrante dia 1 di juni 2023.
Den dicho funcion, e Hunta di Comisarionan di WEB ta supervisa e maneho di e compania, controla e directornan y raporta na Utilities Aruba N.V., cu ta e doño legal di tanto WEB como ELMAR. Ta conoci cu tin hopi reto awendia, entre otro e tarifa di awa y coriente cu ta bou presion enorme debi na cambio den e producto Heavy Fuel Oil, e cambio pa gas, transporte di e producto prima aki pa Aruba y sin lubida e nivel di cashflow cu e compania mester mantene den cuadro di e fiansa haci.
Balans entre profesional y maneho
Si compara e hunta di supervision of hunta di comisarionan den companianan estatal, entre MEP y Raiz, por constata cu Raiz ta purba concentra riba profesionalnan. Mientras cu di un banda esey ta un bon angulo, e otro banda ta si cu mester tin hende cu afinidad politico pa conoce e locual ta biba den comunidad. Y den esey, un persona cu a sirbi e pais aki diferente biaha como e prome mandatario, sin duda tin dicho afinidad, conocemento y suficiente experencia pa por yuda guia e compania nacional den e direccion corecto.
Honra sirbidornan di pueblo
Mar’e cu e nombracion aki, lo por habri espacio pa crea un fenomeno nobo, den cual partidonan tradicional ta distancia for di politikeria y ta honra e ex-mandatarionan cu tipo di puestonan asina. No pa nan keda cu un entrada extra riba nan pensioen, sino pa probecha di nan experencia y conocemento riba maneho, hasta ora nan no ta activo politicamente mas. Ironia ta cu mayoria bes ora MEP sinta ta core cu tur hende cu tin afinidad cu AVP, mientras cu ora AVP sinta na haci mesun cos cu tur hende cu ta parce di e color geel. Asina hamas por honra e sirbidonan di pueblo cu tanto a sacrifica pa nan pais den pasado.
Tocante Nel Oduber
Nelson Orlando Oduber, di 76 aña di edad, ta lider honorario di Partido Movimiento Electoral di Pueblo (MEP). El a integra den e partido na aña 1975. El a bira Minister Presidente pa prome biaha na aña 1989 y a keda den funcion te 1994. Na aña 2001 el a bira Minister Presidente pa di dos biaha y a bolbe gana eleccion, aunke perdiendo asiento na 2005, pero a sigui goberna pa di tres termino como Prome Minister. Prome cu ne Henny Eman (AVP) tabata Minister Presidente y despues di dje a bira Mike Eman (AVP).
Nel Oduber a drenta arena politico dia 4 di Maart 1975. Na tur, Nel Oduber a participa den no menos cu 12 eleccion, tanto di Eilandsraad, Staten di Antiyas Staten di Aruba. De su prome eleccion dia 25 di April 1975, Nel Oduber a sa di saca no menos cu 268 voto. Asina ela sa di crece te cu durante e ultimo eleccion, dia 23 di September 2001, Nel Oduber a saca 4891 voto, birando asina e votegetter den dicho eleccion. Ta bon pa enfatisa, cu desde eleccion na Juni 1977, tur eleccion Nel Oduber a keda eligi cu voto di preferencia.
Nel Oduber ta casa cu Glenda Oduber-Croes y ta tata di Glenson, Danguillaume y Nelson Jr.
Tocante WEB Aruba N.V.
Water- en Energiebedrijf Aruba (WEB) ta existi desde aña 1931 pues tin 92 aña caba y tin mas o menos 350 empleado den servicio directo. Aruba a cuminsa desalina awa di lama desde aña 1903. Na aña 1932 a funda Landswatervoorziening. Desde e tempo ey te aña 2007, Aruba tabata produci awa destila. Na aña 1958 a cuminsa combina produccion di awa y coriente. Na aña 1983 a instala e prome facilidad di Reverse Osmosis. WEB a bira un compania independiente bou di Utilities Aruba NV na januari 1992. Na aña 2004 a desaroya Wind Park Vader Piet y a bay den funcion 5 aña despues. Na aña 2006 a cuminsa uza e prome tres mashinnan “Reciprocating Internal Combustion Engines”, conoci como RECIPs cu un capacidad di 24 Megawatt di produccion di coriente. Na maart 2008 a introduci e unidad di produccion di awa di 8000 m3 pa dia, SWRO.
Na aña 2021, WEB Aruba N.V. tabatin mas di 383 miyon florin na entrada y a haci ganashi balora na mas di 24 miyon florin. Esey ta representa un crecemento di 42% compara cu aña 2020. Cifranan di aña pasa no ta publica ainda.
Gerencia di WEB Aruba N.V. ta consisti di Alfredo Koolman como Chief Executive Officer, Lidia Beukenboom-De Cuba como Financial & Economic Affairs Sector Manager (FEZ), Richard Frank como Production Sector Manager (PROD), Veromar Werleman como Interim Technical Affairs Sector Manager (BTZ), Danilo Croes como Maintenance Sector Manager (OND) y Robert Croes como Water Distribution & Customer Service Sector Manager (WD&CS).
E Hunta di Comisarionan di WEB Aruba N.V. ta consisti di Goswino “Gos” Oduber como presidente (primo di Evelyn Wever y Nel Oduber), Pierre Greaux como comisario, Jozef Semeleer como comisario, Filomeno “Shon No” Maduro como comisario y awo Nel Oduber (primo di Gos Oduber) como comisario.
