Mientras cu e problema ta existi ainda y sin solucion, e pais si ta sigui sinti e efectonan di sushi tira tur rond di Aruba, awa di pos tira den dam, of awa sushi cu ta pasa over bay riba caminda publico. Un Problema cu pa e generacion nobo ta algo cu politiconan di antes no a visualisa, pa busca un solucion na tempo. Pa un politico manera Rycond do Nascimento (parlamentario independiente) e ta simpel. “Coalicion AVP-MEP a neglisha e maneho di desperdicio.”
El a acudi den e fin di siman largo na e RWZI na Zeewijk pa mira e situacion reinante, despues cu a cera RWZI na Parkietenbos y informacion a cuminsa drenta cu ta bashando awa di pos den dam. Dos dia prome doñonan di trucknan di chica pos a declara cu niun momento a papia cu nan riba e situacion y e echo cu mester bay te San Nicolas pa deshaci di e awa, ta algo cu lo subi nan gastonan di operacion.
Pero parlamentario do Nascimento a bisa cu en realidad e problema no ta algo di awo. El a cuminsa for di 1986 ora cu a enfoca pa trece mas turista, expande e pilar economico sin tuma paso pa e consecuencianan cu esaki ta trece cu ne. Pa cuminsa, ya Aruba tabatin un dump ilegal.
Na momento cu Aruba a haya su estado di pais, mester a cuminsa di biaha cu un maneho serio pa loke ta desperdicio. Loke si por a mira den e periodo ey ta cu a bini cu un cantidad grandi di proyecto “pa tira santo den wowo di hende.”. A haci hopi cos pero e mantencion di e pais “tanto di parti di MEP como di AVP nunca tabatey. Nan tabata demasiado preocupa pa haya voto, demasiado preocupa pa gaña e pueblo of haci nan contento cu promesa y empobreciendo dos generacion.
E ta sinti cu tur e politiconan di e dos partidonan ey tabata parti di e maneho cu e ta cuestiona. “Nan ta parti di e problema, di e ladronicia cu a tuma luga. En bes di traha pa e pueblo y futuro di e pais, a traha pa beneficio propio of sponsor di e partidonan. E resultado por mira awe den e red di riool na Noord cu ta yen di buraco, e RWZI-nan di Aruba ta den peligro grandi pasobra nan no tabatin mantencion.”
E forma con a cera dump algo di minister Ursell Arends, pero cu dump a crece manera un Hooiberg ta culpa di MEP y AVP. Cu e maneho di desperdicio na Ser’i Teishi ta saliendo for di man, “no kere cu esey ta algo causa pa e gobierno actual. Esey ta trintiocho aña di gobernacion, di e coalicion AVP cu Mep, bringando brasa,” ta loke cu Rycond do Nascimento a duna di conoce.
