Recientemente Rotary Club Aruba a haci AWG. 67.000 na donacion na diferente instancianan den comunidad di Aruba.
E situacion di covid-19 y tur medidanan cu a wordo tuma door di Gobierno di Aruba a haci cu no tabata posibel pa organisa actividadnan di recaudacion di fondo den e manera usual. Door di esaki Rotary Club Aruba mester a cancela Fiesta Rotaria di 2020 y 2021. Tambe e Golf Tournament cu semper ta tuma luga na fin aña mester a wordo adapta na e “normal nobo” cu covid-19 a trece cu ne. A pesar di esaki Rotary Club Aruba ta keda haci tur loke ta posibel pa sigui duna un man na diferente instancianan den nos comunidad.
Recientemente e directiva di Rotary Club Aruba a haci donacion di total di AWG 67.000 cual a wordo reparti bay di e siguiente instancianan:
Fundacion Ayudo na Aruba (FANA)
FNA ta prepara paketenan di cuminda (custom-made) pa famianan den necesidad y cu tin yiu (nan) di menos cu 4 aña. FANA ta yuda 400 famia pa siman. Stichting Sonrisa / Stichting Trampolin pa Trabao Sonrisa /Trampolin pa Trabao ta traha cu personanan special. Stichting Trampolin pa Trabao tin un programa di “job coach” pa personanan cu desabilidad. E donacion ta pa sostene ambos organisacion den nan operacion.
Stichting Casa Cuna Progreso Casa Cuna ta un cas pa muchanan entre 0-8 aña cu (temporalmente) no ta biba na cas y ta duna
guia na e mayornan. Cu e donacion di ricibi, Casa Cuna por renoba e sistema electrico di e facilidadnan pa asina sigura un ambiente sigur y continuo. Un danki special ta bay na ACE Firm Engineering cu gratuitamente a contribui pa analisa e situacion di e sistema electrico y a duna sosten durante ehecucion di e trabaonan.
Fundacion Hende Muhe den Dificultad (FHMD) awor bao nomber di Fundacion Contra
Violencia Relacional FCVR ta brinda sosten y guia na victimanan di violencia domestico. Donacion a bay via CEDE Aruba cu a guia e proyecto y ta pa yuda cu compra di muebleria pa e proyecto di facilidad di un shelter nobo. Fondonan pa e donacion aki a bin di e Torneo di Golf di Rotary Club Aruba di december 2020.
Den e momento nan dificil cu nos isla ta pasando aden ta importante pa por brinda e ayudo aki na instancianan cu mas mester di dje pa asina yuda nos comunidad surpasa e retonan aki positivamente.
Rotary Club Aruba kier a gradici pueblo di Aruba y nos colaboradornan pa e sosten continuo, hasta den momentonan mas dificil. Esaki realmente ta demostra e confiansa cu comunidad tin den nos organisacion y ta duna tur miembro e energia pa sigui haci e trabou aki.
