Diamars ultimo Parlamento di Aruba a aproba e ley cu ta reglamenta destahonan (aanbestedingsverordening). E ley aki ta sumamente importante debi na e hecho cu e ta aumenta transpariencia, crea “level playing field” pa esnan cu ta entrega un oferta, aumenta eficiencia di e aparato gubernamental y e ta un paso significante den e maneho di Gabinete Wever-Croes pa loke ta fortifica integridad.
AUTORIDAD PA DIRECTORNAN
Aworaki atraves di e ley aki tin un mandato general pa directornan pa tuma decision riba proyectonan te cu 25 mil florin sin cu tin mester di permiso di Minister. Obviamente nan mester responsabilisa nan mes si pa e decision cu nan tuma.
COMPANIANAN DI ESTADO
E reglanan stipula den e ley aki no ta conta pa e companianan di estado. Pa e motibo aki a haci diferente pregunta al respecto. Minister di finanzas a duna di conoce cu lo introduci un codigo di “ corporate good governance” cu lo conta pa tur compania estatal. Di e manera aki practicanan manera a wordo señala den caso “Utilities” lo ta pa pasado.
REGLANAN INTERNO ATRAVES DI UN DECRETO MINISTERIAL
Meta di e ley ta pa eleva eficiencia di e operacionnan diario di e departamentonan gubernamental. Pa e motibo aki sr. Tjon a señala cu no ta solamente mas autoridad pa directornan ora di destahonan ta necesario, pero tambe autoridad pa dicidi riba operacionnan diario.
Ora ta trata aspectonan di mantencion, cursonan pa personal, biahenan pa personal y material pa personal directornan mes mester por dicidi y tuma decision directo. Minister di finanzas a segura sr. Tjon cu den e “uitvoeringsbesluiten” lo tene cuenta cu tur e preocupacionnan aki pa loke ta e operacionnan diario.
PA CONCLUI
Nos ta sumamente satisfecho cu aworaki directornan ta haya mas autoridad. Asina aki ta trata na saca politica afo di cierto aspectonan tambe. Un pabien ta bay na e comision cu a percura pa e ley aki keda cla y wordo presenta na Parlamento. Na mes momento ta deseanan exito pa e siguiente dos proyectonan cu nan lo traha riba dje, cual ta e ley di “landsverordening financieel beheer” y adaptacion di ley di comptabilidad.
