Den nomber di tur e rijscholen di Aruba, sr. Rolando Maduro hunto cu sr. Thomas Ruiz, a gradici minister Bikker, Alan Howell, Milco Baez, Cuerpo Policial y muy en especial sr. Alex Pieters, kendenan a kere den e proyecto aki.
E proyecto aki ta data for di basta tempo. Maduro mes tin casi 14 aña ta purba pa pusha pa un sistema mas actualisa, mas moderno. Tin cu bay cu tecnologia, pasobra e problema tocante di pasamento di rijles, ta e tempo di espera.
Si un candidato ta inscribi pa e haya un fecha pa pasa examen di rijbewijs, e tardansa tabata 9 luna. E demanda pa rijbewijs a bira asina grandi, pero e servicio tabata hopi limita. KPA no tabata tin suficiente personal. Pesey mes mester a busca alternativanan. Ta pesey mes a keda pusha pa bin cu un sistema mas moderno, mas actualisa, caminda cu e servicio lo ta optimalisa. Di parti di e Rijscholen, ta bezig ta lanta un fundacion. A acudi na notario dialuna caba pa esaki. E intencion ta pa hisa e calidad di duna les na nan clientenan. Esaki lo refleha den e siguridad y e comportacion di e chauffeurnan, ora cu nan bay den trafico.
Sr. Thomas Ruiz di su banda a comenta cu e tambe ta forma parti di e organisacion den fundacion di e instructornan, cu ta representa mayoria rijschool na Aruba.
El a comenta cu tambe ta contento cu inicio di e proyecto piloto. Idea ta pa mehora e sistema di duna examen, mehora e calidad tambe di duna les y pa traha conhuntamente, centralmente cu otro.
Si wak por ehempel Corsou, nan ta mas organisa cu Aruba mes. Esey ta e idea pa uni, pa asina organisa esaki mas miho y tambe coordina entre nan mes, hunto cu KPA y tur e otronan cu ta participa pa drecha e sistema, pa asina por mehora e calidad di examen y calidad di duna un servicio na pueblo.
Pesey tambe nan ta hopi contento cu inicio di e proyecto piloto. Nan mes ta preparando pa bay digital. Nan ta mas organisa awo. Nan ta mas of menos 20 rijschool. Awor aki nan ta trahando un poco mas coordina cu otro, unda cu nan ta intercambia di informacion, pa nan ta riba mesun liña. Union ta haci forsa, segun Ruiz. Tambe si nan mira algo cu den nan parecer no ta bon, tambe nan por trece dilanti, manera un grupo.
