E reunion di diahuebs mainta, cu a trata e ley pa exonera Eddie Briesen pa no tin mester di persigui, a bay den un direccion hopi positivo segun Ricky Hoek, mirando cu e coalicion a trece e informacionnan corecto dilanti.
Lamentablemente loke a sali den medio di comunicacion entre diaranson y diahuebs, por mira cu oposicion ta uza medio pa difundi informacion.
Hoek a indica cu den un articulo ta para cu “Gobierno a bin pa legalisa debe di dos miyon florin pa pueblo paga”. Esaki en realidad ta pa trata e ley di Tofanelli, e empresa Mericano cu ta haci concierto, entre Aruba Music Festival, cu den e añanan 2002-2010 lo a tuma luga. Na 2008, unda cu minister Edison Briesen tabata minister y despues di cambio di gobierno, Otmar Oduber a kibra e contract cu e empresa, tabatin varios aña tabatin disputa den corte huridico, ken ta paga, kico t’e gasto dje debenan. Asina a yega n’e suma di dos miyon florin.
Aworaki t’e momento cu gobierno mester paga e placa ey. Pasobra si gobierno no tuma e paso aki pa pag’e, Aruba ta bay hay’e cu un gasto hopi mas grandi. Pasobra lo mester haci investigacion administrativo, bay den cuenta di Tofanelli, cuanto placa el a perde, kico tabata e casonan huridico. E lo bay un caso cu lo dura sigur kisas un otro cinco aña mas. Esey mester evita.
E Landsverordening cu a bin dilanti diahuebs ta, cu parlamento mester duna Dangui Oduber e autorisacion pa haci e pago aki n’e grupo, p’asina e asunto huridico caba. Tur dos partido, Tofanelli y gobierno di Aruba, a yega n’e conclusion cu hunto nan ta yega n’e suma di dos miyon florin, cu tabata e suma cu Tofanelli lo a perde si e lo a bin Aruba, cual tabatin interes den e añanan cu a core.
E mester ta bentahoso tambe pa Aruba. Berdad ta cu si no haci esey aworaki, e lo bay ta hopi mas grandi.
Un punto hopi interesante a bin dilanti ta caminda cu Mike de Meza mes a indica tambe cu Edison Briesen no ta persigui huridicamente mas, pasobra e mes a hala atras y a manda e carta di vrijwaarding, pa no bay den casacion. E carta ta data na april 2017, unda cu Mike de Meza a manda abogado Lejuez (dfm) pa para e caso, caminda cu no ta bay persigui Edison Briesen mas. Tambe hof a bisa y por a mira den varios carta di Ministerio Publico, cu no tin ningun base legal ni motibo pa persigui Edison Briesen.
El a haci su trabao, segun mester ta. El a tuma e decisionnan corecto y no a haci nada fraudulento y coruptivo.
Pa mas detaye lesa TREMPAN.
