Den e dianan tras di lomba por a scucha den medionan di comunicacion e declaracion engañoso di Mike Eman cu ta; redobla pensioen cu 50% pa e pensionadonan. Esaki sigur ta un bon has cu Mike Eman kier uza pa gara un biaha mas na manera engañoso e pensionadonan, Parlamentario Ricky Hoek di Fraccion di MEP a declara.
Echo ta cu accion ta pisa mas cu palabra y cu Gabinete Wever-Croes I & II si a hisa e suma di pensioen. Contrario na Mike Eman cu a corta den e cartera di e pensionadonan. Aki ta sigui un resumen di e sumanan di pensioen durante gobernacion di AVP for di 2009 pa 2017 y bou di gobernacion di MEP for di 2017 pa 2024. Durante cu Mike Eman tabata lidera pais Aruba, su intencion no tabata pa yuda e pensionadonan, manera e la insinua den prensa. Ata prueba aki:
Na aña 2009 ora Mike Eman a bira prome minister e suma di pensioen di biehes di un persona soltero tabata 1.057 florin. Bo sa cu cuanto placa Mike a aumenta esaki den su 8 aña di gobernacion? Cu solamente 50 florin!
Den caso cu pone e reparatietoeslag acerca cu na 2017 tabata 100 florin, e aumento ta bira 150 florin den 8 aña. Laga nos haci un comparacion. Bo sa cu cuanto gobierno di MEP a aumenta e pensioen pa un persona soltero incluyendo e aumento extra di reparatietoeslag? Esaki ta nada menos cu un suma di 228 florin! Esaki ta pa ilustra cu e aumento bou gobierno di MEP ta 52% mas hopi compara cu e aumento bou gobierno di Mike Eman. Ata mas prueba aki pa pensionado pareha casa. Mescos cu na 2009 ora Mike Eman a bira Prome Minister, e suma di pensioen di biehes pa pareha casa tabata 1.780 florin.
Bo kier sa kico ta e suma cu e a aumenta esaki den 8 aña? Cu solamente 84 florin! Si agrega e reparatietoeslag cu na 2017 tabata 100 florin, e aumento ta bira 184 florin den un periodo di 8 aña.
Si nos bolbe haci un comparacion entre e gobernacion di AVP y esun di MEP, por constata cu gobierno di MEP a aumenta e pensioen pa pareha casa incluyendo e aumento extra di reparatie toeslag na un suma di 336 florin. Loke ta nifica cu e aumento bou gobierno di MEP ta 83% mas cu e aumento bou gobierno di Mike Eman. Ta importante pa remarca lo siguiente. E aumento di pensioen cu gobierno di MEP a ehecuta ta completamente responsabel basa riba investigacion y calculacion realistico. Por ultimo por conclui cu ambos Gabinete Wever-Croes tin e interes di nos pensionadonan na pecho y pa aña 2025 lo aumenta pensioen di biehes pa di 5 biaha, Parlamentario Hoek a finalisa bisando.
